ដំបូងគេនៅខ្មែរ! ជីកូរ៉េផ្ទាប់ហូប ជាមួយសាច់អាំង ១គីឡូមិនតិចជាង១០$ ដាំបានហើយនៅសៀមរាប

Details

Category: ព័ត៌មានកសិកម្ម

ជីកូរ៉េ ជាបន្លែមួយប្រភេទដែលប្រជាជនខ្មែរស្គាល់ថាជាបន្លែដែលគេនិយមញ៉ាំផ្ទាប់ជាមួយសាច់អាំងបែបកូរ៉េ ឬសាច់អាំងទឹកកាពិជាដើម។ ជីកូរ៉េ មានច្រើនប្រភេទ តែមានពីរប្រភេទប៉ុណ្ណោះដែលគេនិយមបរិភោគ នោះគឺជីកូរ៉េស្លឹកក្រហម ឬស្វាយ និងជីកូរ៉េស្លឹកបៃតង។

ស្លឹកបន្លែមួយប្រភេទនេះពេញនិយមបរិភោគនៅបណ្ណាប្រទេសដូចជា កូរ៉េ ចិន និងជប៉ុនជាដើម។ ក្នុងពេលបច្ចុប្បន្ននេះ ស្លឹកជីដែលមានក្លិនប្រហើរមួយប្រភេទនេះក៏កំពុងពេញនិយមនៅប្រទេសកម្ពុជាផងដែរ ដោយគេឃើញមានដាក់លក់នៅតាមផ្សារទំនើប ម៉ាត ក៏ដូចជាភោជនីយដ្ឋានកូរ៉េ និងជប៉ុនជាដើម។ បើតាម លោក ប៊ុន ធឿន ដែលជាអ្នកដាំជីមួយប្រភេទនេះដំបូងគេនៅប្រទេសកម្ពុជា បានឲ្យដឹងថា លោកបានសាកល្បងដាំរុក្ខជាតិមួយនេះនៅលើទឹកដីនៃខេត្តសៀមរាបក្នុងកំឡុងឆ្នាំ ២០២២ ដែលការចាប់ផ្តើមដំបូងលោកពុំទាន់ដឹងច្បាស់ពីបច្ចេកទេសក្នុងការដាំ ទើបលោកមិនទទួលបានជោគជ័យនោះទេ។

ក្រោយពីចំណាយពេលសិក្សា និងសាកល្បងដាំប្រហែលជា ២ឆ្នាំ បុរសរូបនេះក៏ទទួលបានជោគជ័យក្នុងការដាំជីកូរ៉េនេះ។ លោកបានបន្តថា ប្រមាណជា ១ឆ្នាំចុងក្រោយនេះ លោកបានសាងសង់ផ្ទះសំណាញ់ ៣សម្រាប់ដាំដុះដែលផ្ទះនីមួយៗមានទំហំប្រមាណ ២៥០ទៅ ៣០០ម៉ែត្រការ៉េ ដើម្បីគ្រប់គ្រងសីតុណ្ហភាព និងការពារពីទឹកភ្លៀងផងដែរ។ បច្ចុប្បន្ននេះ លោកក៏បានសាងសង់ផ្ទះសំណាញ់ ៣បន្ថែមទៀតដើម្បីពង្រីកការដាំដុះរបស់លោក ឆ្លើយតបទៅនឹងតម្រូវការទីផ្សារនៅក្នុងប្រទេសកម្ពុជា។ពេលនិយាយទៅដល់បច្ចេកទេសដាំដុះ លោក ប៊ុន ធឿន ក៏បានជម្រាបផងដែរថា គេដាំរុក្ខជាតិមួយនេះដោយការបណ្តុះគ្រាប់ ដែលវាអាចលូតលាស់បានល្អនៅសីតុណ្ហភាពចន្លោះពី ២៥ ទៅ ៣៥ អង្សារសេ ហើយគេចាប់ផ្តើមប្រមូលផលចាប់ពីអាយុ ៣៥ថ្ងៃឡើងទៅ។ ចំណែកឯការប្រមូលផលវិញ គឺលោកបេះស្លឹករបស់វាក្នុងរយៈពេល ៣ថ្ងៃម្តង ដែលក្នុងមួយលើកលោកអាចទទួលទិន្នផលប្រមាណ ១៥គីឡូក្រាម និងលក់បានក្នុងតម្លៃថ្លៃដល់ទៅ ១០ ដុល្លារក្នុង ១ គីឡូក្រាម នៅលើទីផ្សារ។

លោកបន្តថា ជីកូរ៉េជាប្រភេទរុក្ខជាតិដែលគេយកតែស្លឹកបរិភោគ ដូច្នេះគេបេះតែស្លឹកវាតែប៉ុណ្ណោះ ហើយទុកដើមឲ្យលូតលាស់ស្លឹកបន្ត។ ចំពោះស្លឹកទៀតសោត គួរតែជ្រើសរើសស្លឹកដែលត្រូវតាមស្តង់ដាដោយកំណត់សម្គាល់ទៅលើ ទំហំស្លឹក ពណ៌ស្លឹក រសជាតិ និងក្លិន។“ប្រទេសកម្ពុជាកំពុងមានកំណើនអ្នកវិនិយោគ និងភ្ញៀវទេសចរមកពីប្រទេសកូរ៉េ អាស្រ័យហេតុនេះម្ហូបអាហារកូរ៉េក៏មានតម្រូវការច្រើនទៅតាមហ្នឹងដែរ។ ក៏ប៉ុន្តែ ការផ្គត់ផ្គង់នៅតាមទីផ្សារ និងភោជនីដ្ឋាននានានៅមានកម្រិតនៅឡើយ ជាពិសេសស្លឹកជីកូរ៉េដែលមិនទាន់មានអ្នកដាំ ទើបខ្ញុំសម្រេចចិត្តដាំរុក្ខជាតិនេះដើម្បីផ្គត់ផ្គង់នៅលើទីផ្សារ។

ម្យ៉ាងវិញទៀត ខ្ញុំមានចក្ខុវិស័យមួយ គឺចង់នាំចេញស្លឹកជីកូរ៉េ និងបន្លែផ្សេងៗទៀតទៅកាន់ទីផ្សារកូរ៉េ និងជប៉ុន ព្រោះខ្ញុំមើលឃើញថាយើងអាចចាប់យកឱកាសដាំដុះស្លឹកមួយនេះ ខណៈពេលដែលប្រទេសកូរ៉េ និងជប៉ុនចុះត្រជាក់បង្កផលលំបាកដល់ការដាំដុះ ពោលគឺចន្លោះពីខែ ធ្នូ ដល់ ខែ មីនា។’’ នេះជាការលើកឡើងរបស់ លោកប៊ុន ធឿន អ្នកដំបូងគេដែលដាំជីកូរ៉េនៅកម្ពុជា។ គួរជម្រាបផងដែរថាលោក ប៊ុន ធឿន គឺជាម្ចាស់កសិដ្ឋានដាំដំណាំស្លឹកជីកូរ៉េ ឈ្មោះ Farm to Hand ដែលមានទីតាំងនៅខេត្តសៀមរាប។

ដូច្នេះសម្រាប់បងប្អូនដែលមានបំណងស្វែងរកទិញស្លឹកជីកូរ៉េអាចធ្វើការទំនាក់ទំនងទៅកាន់លេខទូរស័ព្ទឬតេឡេក្រាម 011 923 954 របស់ម្ចាស់កសិដ្ឋានផ្ទាល់៕

ដកស្រង់ពី៖Business Cambodia