Facebook បិទលែងឲ្យប្រជាជនសិង្ហបុរីចូលមើល Page មួយ ដែលប្រឆាំងរដ្ឋាភិបាលសិង្ហបុរី

Details

Category: International News

(សិង្ហបុរី)៖ ក្រុមហ៊ុន Facebook បានបិទលែងឲ្យអ្នកប្រើប្រាស់ បណ្តាញសង្គមនេះនៅសិង្ហបុរី ចូលមើល Page មួយមានឈ្មោះថា State Times Review (STR) បានទៀតឡើយ ក្រោយពីត្រូវរដ្ឋាភិបាល សិង្ហបុរីស្នើឲ្យធ្វើយ៉ាងដូច្នោះ។

នេះបើតាមការដកស្រង់ការផ្សាយចេញពី សារព័ត៌មាន CNA នៅថ្ងៃពុធ ទី១៩ ខែកុម្ភៈ ឆ្នាំ២០២០។ រដ្ឋាភិបាលសិង្ហបុរីបានស្នើឲ្យ Facebook រារាំងការចូលមើល Page «State Times Review» បន្ទាប់ពី Page នេះ បានបង្ហោះព័ត៌មានអំពី ស្ថានភាពនៃការរីករាលជំងឺ COVID-19 ដែលមិនមានការពិត។

Page នេះ ជារបស់បុគ្គលឈ្មោះ Alex Tan ដែលមាននិន្នាការនយោបាយ ប្រឆាំង រដ្ឋាភិបាល សិង្ហបុរី ហើយបានផ្សព្វផ្សាយនូវព័ត៌មាន ដែលរដ្ឋាភិបាលសិង្ហបុរី អះអាងថា គ្មានការពិតជាច្រើនលើកមកហើយ។

គួរជម្រាបថា Page «State Times Review» មិនត្រូវបាន Facebook បិទចោលទាំងស្រុងនោះទេ ដោយគ្រាន់តែអ្នកប្រើប្រាស់បណ្តាញនេះ នៅក្នុងប្រទេសសិង្ហបុរី មិនអាចចូលមើល Page នេះ បាន ប៉ុន្តែអ្នកប្រើប្រាស់នៅប្រទេសផ្សេងទៀត គឺនៅមើលឃើញបានជាធម្មតា៕

ដកស្រង់ពី៖ Fresh News