ភ្លៀងមូសុង សម្លាប់មនុស្ស ៧៧នាក់នៅប៉ាគីស្ថាន

Details

Category: International News

 យ៉ាងហោចណាស់មនុស្ស ៧៧ នាក់ បានស្លាប់នៅក្នុងភ្លៀងមូសុង ដែលវាយលុកប្រទេសប៉ាគីស្ថាន នេះបើតាមការឲ្យដឹងពីនាយករដ្ឋមន្រ្តីក្រសួងផ្លាស់ប្តូរអាកាសធាតុ កាលពីថ្ងៃពុធ ដោយព្រមានថា នឹងមានភ្លៀងធ្លាក់ខ្លាំងជាងធម្មតានៅពេលខាងមុខ។

អ្នកស្លាប់ភាគច្រើន គឺនៅក្នុងខេត្ត Balochistan ភាគនិរតី ជាកន្លែងដែលមនុស្ស 39 នាក់បានលង់ទឹកស្លាប់ ឬត្រូវបានចរន្តអគ្គិសនីឆក់ ដោយសារខ្សែភ្លើង ដាច់ធ្លាក់ចុះ។

ខ្យល់មូសុង ដែលជាធម្មតាមានរយៈពេលពីខែមិថុនា ដល់ខែកញ្ញា មានសារៈសំខាន់សម្រាប់ការស្រោចស្រពដំណាំ និងការបំពេញបឹង និងទំនប់នៅទូទាំងឧបទ្វីបឥណ្ឌា ប៉ុន្តែជារៀងរាល់ឆ្នាំ ក៏នាំមកនូវរលកនៃការបំផ្លិចបំផ្លាញផងដែរ។

ផ្ទះ ដែលសាងសង់មិនបានល្អនៅទូទាំងប្រទេសប៉ាគីស្ថាន ជាពិសេសនៅតំបន់ជនបទ ងាយនឹងដួលរលំដោយសារទឹកជំនន់ ដែលបំផ្លាញដីស្រែចំការដ៏ធំផងដែរ។ ប៉ាគីស្ថាន គឺជាប្រទេស ដែលងាយរងគ្រោះបំផុតទីប្រាំបីចំពោះអាកាសធាតុធ្ងន់ធ្ងរ បណ្តាលមកពីការប្រែប្រួលអាកាសធាតុ នេះបើតាមការផ្សាយរបស់ AFP កាលពីយប់ថ្ងៃពុធ។