អាមេរិក តឿនតួកគីឲ្យឆាប់ផ្តល់សច្ចាប័នលើសមាជិកភាពស៊ុយអែត ក្នុង NATO
- Details
- Category: International News
រដ្ឋមន្ត្រីការបរទេសអាមេរិក លោក អាន់តូនី ប្ល៊ីនខិន កាលពីថ្ងៃអង្គារ បានជំរុញដល់តួកគីឲ្យឆាប់សម្រេច បាននូវដំណើរការយល់ព្រមឲ្យស៊ុយអែត ចូលជាសមាជិករបស់អង្គការណាតូ (NATO) ដោយនិយាយថា ប្រទេសក្នុងតំបន់អឺរ៉ុបខាងជើងមួយនេះ បានចាត់វិធានការសំខាន់ៗរួចហើយ ដើម្បីដោះស្រាយការជំទាស់ របស់ទីក្រុង អង់ការ៉ា ចំពោះសមាជិកភាពរបស់ខ្លួន។
ថ្លែងក្នុងសន្និសីទសារព័ត៌មានរួមគ្នា ជាមួយនាយករដ្ឋមន្ត្រីស៊ុយអែត នៅទីក្រុងលូលេអា ដែលស្ថិតភាគ ខាងជើងប្រទេសស៊ុយអែត លោក ប្ល៊ីនខិន បាននិយាយថា ទីក្រុងវ៉ាស៊ីនតោន នឹងបន្តធ្វើការដើម្បីបញ្ចប់ ការចូលជាសមាជិករបស់ស៊ុយអែត ឲ្យទាន់ពេលវេលាសម្រាប់កិច្ចប្រជុំកំពូលរបស់អង្គការណាតូ នៅពាក់ កណ្តាលខែកក្កដា ខាងមុខនេះ។
សូមបញ្ជាក់ថា តួកគី បានយល់ព្រមផ្ដល់សច្ចាប័នលើសមាជិកភាពណាតូរបស់ហ្វាំងឡង់រួចរាល់ហើយ កាលពីខែមីនា ប៉ុន្តែនៅតែបដិសេធចំពោះស៊ុយអែត ដោយចោទថា ប្រទេសនេះ ផ្ដល់ទីជម្រកដល់ក្រុមសកម្មប្រយុទ្ធ ដែលតួកគីកំពុងតាមចាប់ និងចាត់ទុកថា ជាភេរវករ នេះបើតាមការផ្សាយរបស់ AFP ។
