ភ្នំពេញ: ខេត្តសៀមរាប ដែលជាគោលដៅទេសចរណ៍វប្បធម៌ កាលពីថ្ងៃទី៣១ ខែកក្កដា ដល់ថ្ងៃទី៧ ខែសីហា ឆ្នាំ២០២២បានធ្វើជាម្ចាស់ផ្ទះកិច្ចប្រជុំឧត្តមមន្ត្រីសេដ្ឋកិច្ចអាស៊ានលើកទី៣ ដើម្បីត្រៀមរៀបចំកិច្ចប្រជុំរដ្ឋមន្ត្រីសេដ្ឋកិច្ចអាស៊ាន លើកទី៥៣។
កិច្ចប្រជុំនេះ ដឹកនាំដោយ លោក រដ្ឋ សារ៉ាវុធ អគ្គនាយកពាណិជ្ជកម្មអន្តរជាតិ ដោយមានការចូលរួមដោយអគ្គលេខាធិការរងអាស៊ានទទួលបន្ទុកសសរស្តម្ភសហគមន៍សេដ្ឋកិច្ចអាស៊ាន ឧត្តមមន្ត្រីសេដ្ឋកិច្ចអាស៊ាននៃប្រទេសសមាជិកអាស៊ានទាំងអស់ និងប្រទេសដៃគូរបស់អាស៊ាន និងគណៈប្រតិភូនៃប្រទេសនីមួយៗ ព្រមទាំងមន្ត្រីលេខាធិការដ្ឋានអាស៊ានផងដែរ។
លោកប្រធានអង្គប្រជុំ បានសម្តែងមតិស្វាគមន៍យ៉ាងកក់ក្តៅ និងបានថ្លែងអំណរគុណចំពោះសមាជិកអង្គប្រជុំទាំងអស់ ដែលតែងតែផ្តល់នូវការគាំទ្រយ៉ាងសកម្ម ក្នុងការចូលរួមផ្លាស់ប្តូរមតិយោបល់លើបញ្ហាដែលមានក្នុងរបៀបវារៈនីមួយៗ យ៉ាងផុសផុល និងផ្តល់នូវការឆ្លើយតបចំពោះបញ្ហានានាប្រកបដោយភាពទន់ភ្លន់ និងស្មារតីទទួលខុសត្រូវខ្ពស់។
លោកមអគ្គនាយក បញ្ជាក់ថា អង្គប្រជុំបានកត់សម្គាល់ និងពិភាក្សាលើរបៀបវារៈសំខាន់ៗ រួមមាន៖
(១) ការតាមដានសកម្មភាពពីសេចក្តីសម្រេចដែលបានធ្វើឡើងកាលពីកិច្ចប្រជុំលើកទី១ នៃឧត្តមមន្ត្រីសេដ្ឋកិច្ចអាស៊ាន (SEOM 2/53),
(២) វឌ្ឍនភាពសមិទ្ធផលអាទិភាពសេដ្ឋកិច្ច (Priority Economic Deliverables – PEDs) របស់កម្ពុជាសម្រាប់ភាពជាប្រធានអាស៊ានឆ្នាំ២០២២
(៣) កិច្ចព្រមព្រៀងសេដ្ឋកិច្ចអាស៊ាន,
(៤) ការត្រៀមរៀបចំកិច្ចប្រជុំលើកទី៥៤ ថ្នាក់រដ្ឋមន្ត្រីសេដ្ឋកិច្ចអាស៊ាន កិច្ចប្រជុំលើកទី២១នៃក្រុមប្រឹក្សាសសរស្តម្ភសេដ្ឋកិច្ចអាស៊ាន និងការត្រៀមរៀបចំឯកសារសំខាន់ៗដាក់ជូនកិច្ចប្រជុំកំពូលអាស៊ានលើកទី៤០ និងលើកទី៤១,
(៥) វឌ្ឍនភាពនៃការចរចាដំឡើងកម្រិតនៃកិច្ចព្រមព្រៀងពាណិជ្ជកម្មទំនិញអាស៊ាន (ATIGA Upgrade),
(៦) ការស្នើសុំចូលជាសមាជិកអាស៊ានរបស់ទីម័រខាងកើត
(៧)អនុស្សរណៈយោគយល់ស្តីពីការអនុវត្តវិធានការមិនមែនពន្ធគយលើមុខទំនិញចាំបាច់ និងការពង្រីកបញ្ជីទំនិញចាំបាច់,
(៨) គំនិតផ្តួចផ្តើមលើគម្រោងមូលដ្ឋានអាស៊ាន,
(៩) កិច្ចព្រមព្រៀងអាស៊ានស្តីពីចលនារបស់បុគ្គល
(៩) កម្មវិធីការងាររបស់ឧត្តមមន្ត្រីសេដ្ឋកិច្ចអាស៊ាន ប្រចាំឆ្នាំ២០២២,
(១០) កិច្ចពិភាក្សាផ្ទៃក្នុងត្រៀមសម្រាប់ការជួបប្រជុំពិគ្រោះយោបល់ជាមួយដៃគូសន្ទនាសំខាន់ៗ និងបញ្ហាផ្សេងៗទៀត។ជាមួយគ្នានេះ ឧត្តមមន្ត្រីសេដ្ឋកិច្ចអាស៊ានបានជួបពិភាក្សាពិគ្រោះយោបល់ជាមួយប្រទេសដៃគូសន្ទនាចំនួន ១១ រួមមាន៖
១. កិច្ចប្រជុំឧត្តមមន្ត្រីសេដ្ឋកិច្ចអាស៊ាន-កាណាដាលើកទី១៦
២. កិច្ចប្រជុំឧត្តមមន្ត្រីសេដ្ឋកិច្ចអាស៊ាន-កូរ៉េលើកទី៣៧
៣. កិច្ចប្រជុំឧត្តមមន្ត្រីសេដ្ឋកិច្ចអាស៊ាន-អាមេរិកលើកទី៣៦
៤. កិច្ចប្រជុំឧត្តមមន្ត្រីសេដ្ឋកិច្ចអាស៊ាន-អង់គ្លេសលើកទី៣
៥. កិច្ចប្រជុំឧត្តមមន្ត្រីសេដ្ឋកិច្ចអាស៊ាន-អូស្ត្រាលី-នូវែលហ្សេឡង់លើកទី៤១
៦. កិច្ចប្រជុំឧត្តមមន្ត្រីសេដ្ឋកិច្ចអាស៊ាន-ចិនលើកទី៤១
៧. កិច្ចប្រជុំឧត្តមមន្ត្រីសេដ្ឋកិច្ចអាស៊ាន-ជប៉ុនលើកទី២៧។
៨. កិច្ចប្រជុំឧត្តមមន្ត្រីសេដ្ឋកិច្ចអាស៊ាន-រុស្សី លើកទី១៤។
៩. កិច្ចប្រជុំឧត្តមមន្ត្រីសេដ្ឋកិច្ចអាស៊ានបូកបី លើកទី៣៩។
១០. កិច្ចប្រជុំឧត្តមមន្ត្រីសេដ្ឋកិច្ចអាស៊ីបូព៌ា លើកទី៣៩។
១១. កិច្ចប្រជុំឧត្តមមន្ត្រីសេដ្ឋកិច្ចអាស៊ាន-ហុងកុងលើកទី២៧។
ក្នុងឱកាសនោះ សមាជិកទាំងអស់នៃកិច្ចប្រជុំ បានធ្វើការផ្លាស់ប្តូរមតិយោបល់ ពិភាក្សា ផ្តល់បច្ចុប្បន្នភាព និងចូលរួមយ៉ាងសកម្មទៅលើរបៀបវារៈនីមួយៗ ដែលធ្វើឱ្យកិច្ចប្រជុំនេះបញ្ចប់ទៅយ៉ាងរលូន និងប្រកបដោយផ្លែផ្កាគួរឱ្យកត់សម្គាល់។
កិច្ចប្រជុំនៃឧត្តមមន្ត្រីសេដ្ឋកិច្ចអាស៊ាន ដែលប្រទេសឥណ្ឌូនេស៊ីក្នុងតួនាទីជាប្រធានកិច្ចប្រជុំឧត្តមមន្ត្រីសេដ្ឋកិច្ចអាស៊ាន ដោយប្រទេសឥណ្ឌូនេស៊ីជាប្រធានអាស៊ានឆ្លាស់វេននៅឆ្នាំ២០២៣៕
ដកស្រង់ពី៖ រស្មីកម្ពុជា