លែងមានអីត្រូវសង្ស័យ ថ្ងៃ Samsung ប្រកាសចេញត្រកូល Galaxy S21
- Details
- Category: Other News
Samsung នឹងប្រកាសចេញ Galaxy S21 Series ជាផ្លូវការនៅទូទាំងសកលលោកនាថ្ងៃទី១៤ ខែមករាខាងមុខនេះ។ នេះបើតាមការបញ្ជាក់ពីហាងលក់ផលិតផល Samsung ដ៏ធំជាងគេមួយនៅប្រទេសឥណ្ឌា។
អ្នកចាត់ការនៅហាង Samsung សាខា Opera House ក្នុងទីក្រុង Bengaluru ប្រទេសឥណ្ឌាបានបញ្ជាក់ប្រាប់វិបសាយ Android Authority ថា Galaxy S21 អាចនឹងមានលក់នៅប្រទេសឥណ្ឌា ប្រហែល១សប្ដាហ៍ក្រោយការប្រកាសចេញ។ បន្ថែមពីនេះហាងខាងលើក៏បានចាប់ផ្ដើមទទួលយកការកុម្ម៉ង់ទិញទុកមុនសម្រាប់ Galaxy S21, Galaxy S21+ និង Galaxy S21 Ultra នៅប្រទេសឥណ្ឌាផងដែរ។
ក្រៅពីបានបញ្ជាក់អំពីថ្ងៃប្រកាស និងពេលចេញលក់ អ្នកចាត់ការដដែលក៏បានបញ្ជាក់អំពីជម្រើសពណ៌ ដែល Galaxy S21 នឹងមានប្រផេះ, ផ្កាឈូក, ស្វាយ និងស។ Galaxy S21+ មានជម្រើសពណ៌ផ្កាឈូក, ស្វាយ, ប្រាក់, និងពណ៌ខ្មៅ ហើយ Galaxy S21 Ultra មានជម្រើសពណ៌ខ្មៅ និងពណ៌ប្រាក់៕
ដកស្រង់ពី៖sabay