ខ្លាំងនៅតែខ្លាំង! ផលិតករវ័យក្មេង យន ប៊ុនរាជ មានមហិច្ឆតាមិនគួរឲ្យជឿក្នុងវិស័យភាពយន្ត និងចម្រៀងខ្មែរ
- Details
- Category: Other News
ផលិតករវ័យ២៣ឆ្នាំ យន ប៊ុនរាជ ហៅ Mr. Fun Cambodia គ្រោងចេញរឿងបែបអប់រំ ស្នេហា កំប្លែង និងបទចម្រៀងក្នុងពេលឆាប់ៗនេះ ក្រោយពីចេញរឿង"មួយម៉ាត់ស្លាប់មួយម៉ាត់រស់"សម្ដែងដោយ កញ្ញា Ka Bella ទើបផ្ទុះការគាំទ្រ។
ក្រោយដើរចេញពីទូរទស្សន៍ថោន ក្នុងតួនាទីជាប្រធានផ្នែកនិពន្ធ ដើម្បីវិវឌ្ឍខ្លួនឲ្យកាន់តែប្រសើរ កាលពីដើមខែធ្នូ ឆ្នាំ២០២០ លោក យន ប៊ុនរាជ បានបញ្ចេញស្នាដៃរឿងអប់រំបែបលើកទឹកចិត្តនេះ ហើយកញ្ញា Ka Bella បានក្លាយជាតួអង្គសំខាន់ក្នុងរឿងដែលជាស្នាដៃដំបូងរបស់លោកក្នុងស្ថាប័នថ្មី។
លោក យន ប៊ុនរាជ បានប្រាប់ Sabay និយាយថា រូបលោកមានក្ដីស្រមៃ ចង់រួមចំណែកធ្វើឲ្យវិស័យភាពយន្តខ្មែរមានការគាំទ្រខ្លាំងដូចភាពយន្តបរទេស។ សម្រាប់ការងារថ្មីក្នុងតួនាទីជាផលិតករ និងជាអ្នកគ្រប់គ្រងមួយរួបនៅស្ថាប័ន Media Load គឺលោកនឹងប្រឹងប្រែងឲ្យអស់សមត្ថភាព និងបញ្ចេញស្នាដៃឲ្យបានកាន់តែច្រើនក្នុងឆ្នាំ២០២១ នេះ។ លោក យន ប៊ុនរាជ៖"ខ្ញុំធ្លាប់ធ្វើជាកម្មករសំណង់ អីចឹងខ្ញុំចង់វិវឌ្ឍខ្លួនឯងឲ្យកាន់តែខ្លាំងជាងមុន ជាពិសេសវិស័យតែងនិពន្ធនេះ។
ពេលខ្លះខ្ញុំស្រមៃគិតសាច់រឿងដល់ថ្នាក់ដេកលក់មួយភាំងក៏មាន អីចឹងហើយខ្ញុំសង្ឃឹមថាការប្រឹងប្រែងរបស់ខ្ញុំសម្រាប់រឿង ឬចម្រៀងក្រោយៗនេះទទួលបានការគាំទ្រកាន់តែច្រើន"។ សូមរំលឹកថា ផលិតករ យន ប៊ុនរាជ បានប្រឡងជាប់សញ្ញាប័ត្រមធ្យមសិក្សាទុយភូមិនៅឆ្នាំ២០១៥។
ក្រោយមក គឺនៅឆ្នាំ២០១៥ លោកបានសិក្សាបន្តនៅវិទ្យាស្ថានជាតិប្រៃសណីយ៍ និងទូរគមនាគមន៍ ផ្នែកបច្ចេកវិទ្យាគមនាគមន៍ និងព័ត៌មាន(NIPTICT) ដោយចេញធ្វើការបណ្ដើរនៅស្ថានីយទូរទស្សន៍ថោនក្នុងតួនាទីជាអ្នកគ្រប់គ្រងផ្នែកនិពន្ធ។ ក្នុងរយៈពេលដ៏ខ្លីនេះលោកមានស្នាដៃស្ទើររាប់មិនអស់នៅកម្មវិធីកំប្លែង"ដូច្នឹងផង" កំប្លែងហ្មង និងកម្មវិធី"ដូច្នឹងផងKid”៕
ដកស្រង់ពី៖ Sabay