កក្រើកមែនទែនហើយ លេចរឿង Galaxy បញ្ជាទិញ Robot ១គ្រឿងតម្លៃកប់ក្ដោងពីអាឡឺម៉ង់មកដាក់ក្នុងសង្វាក់ផលិតកម្មរបស់ខ្លួន
- Details
- Category: Other News
ត្បិតថាមើលពីខាងក្រៅអ្វីស្ងប់ស្ងាត់ ប៉ុន្តែតាមព័ត៌មានបានឲ្យដឹងថា ផលិតកម្ម Galaxy Navatra កំពុងមានផែនការធំ ដោយថ្មីៗនេះ ទើបមានដំណឹងថា បានបញ្ជាទិញ Robot មួយគ្រឿងពីប្រទេសអាឡឺម៉ង់ថែមទៀតផង។
នេះ គឺដំណឹងដ៏កក្រើកមួយ ហើយប្រសិនបើវាជាការពិត នេះគឺជាលើកដំបូងបង្អស់លើគ្រប់វិស័យទាំងអស់ នៅក្នុងប្រទេសកម្ពុជា ដែលមានដាក់បញ្ចូល Robot ទៅក្នុងសង្វាក់ផលិតកម្មនៃការងាររបស់ខ្លួន ខណៈស្ថានភាពនេះ ប្រិយមិត្តធ្លាប់តែបានឃើញនៅបណ្ដាប្រទេសជឿនលឿនខាងបច្ចេកវិទ្យា ដូចជា អាមេរិក អាឡឺម៉ង់ ជប៉ុន ជាដើមប៉ុណ្ណោះ។ ដំណឹងនេះ បានលេចចេញពីផ្ទៃក្នុងរបស់ផលិតកម្មផ្ទាល់តែម្ដង។
តាមប្រភពមិនបញ្ចេញឈ្មោះនេះ Robot ដែលផលិតកម្ម Galaxy បានបញ្ជាទិញនោះ គឺជាប្រភេទដៃយន្ត ដែលគេឃើញប្រើភាគច្រើននៅក្នុងឧស្សាហកម្មហូលីវូដ។ ដៃយន្តនេះ នឹងត្រូវដាក់បញ្ចូលទៅក្នុងសង្វាក់ផលិតកម្មផលិតបទចម្រៀងរបស់ខ្លួន ដើម្បីធានាគុណភាព និងប្រសិទ្ធភាព។
ធ្វើបែបនេះ ព្រោះថា គ្រឿងយន្ត ឬ Robot មួយគ្រឿងនោះ មានភាពបត់បែនជាង ចំណេញពេលវេលា ព្រមទាំងកាត់បន្ថយហានិភ័យបានច្រើនជាង ទាំងលើការប្រើឧបករណ៍ និងកម្លាំងពលកម្មមនុស្សថែមទៀត។ យ៉ាងណា ក៏ដោយតម្លៃវិញ ក៏ខ្ពស់កប់ពពកដែរ ក្នុងនោះ បើតាមការបង្ហើបរបស់ប្រភពដដែល Robot មួយគ្រឿងនេះមានតម្លៃប្រមាណជាង ២0ម៉ឺនដុល្លារអាមេរិកឯណោះ។
តាមដំណឹង Robot ១គ្រឿងនេះ ផលិតកម្មសម្បូរលុយមួយនេះ បានបញ្ជាទិញរួចរាល់ហើយ ប៉ុន្តែគេមិនបានដឹងឡើយថា គ្រឿងយន្តមួយនេះ នឹងអាចមកដល់ស្រុកខ្មែរ ក៏ដូចជាផលិតកម្មនៅពេលណានោះទេ។ ជុំវិញបញ្ហានេះ មិនទាន់មានការបញ្ជាក់ជាផ្លូវការពីថ្នាក់ដឹកនាំរបស់ផលិតកម្មនៅឡើយ។ លោក យឹម តាស្រង់ បានសុំសិទ្ធិ មិនអធិប្បាយពីរឿងនេះ។ ដោយឡែកអ្នកឧកញ៉ា ឡេង ណាវ៉ាត្រា ដែលម្ចាស់ថវិកាដ៏សន្ធឹកសន្ធាប់នោះ ក៏មិនទាន់អាចសុំការអធិប្បាយបានដូចគ្នា៕
ដកស្រង់ពី៖ Sabay