អភិបាលខេត្តត្បូងឃ្មុំ បន្តនាំយកអំណោយមនុស្សធម៌ សាខាកាកបាទក្រហមខេត្ត ចែកជូនជនងាយរងគ្រោះ ៥៤គ្រួសារបន្ថែម នៅស្រុកមេមត់

Details

Category: Provincial News

(ត្បូងឃ្មុំ)៖ ក្រោមការយកចិត្តទុកដាក់ខ្ពស់ ពីសំណាក់អភិបាលខេត្តត្បូងឃ្មុំ តែងតែចុះតាមមូលដ្ឋាន ព្រួយបារម្ភពីសុខទុក្ខបងប្អូនប្រជាពលរដ្ឋ ឯកឧត្តមបណ្ឌិត ជាម ច័ន្ទសោភ័ណ ដែលជាប្រធាន គណៈកម្មាធិការសាខាកាកបាទក្រហមខេត្ត និងលោកជំទាវ រួមទាំងសហការី បានអញ្ជើញបន្តចុះជួបសំណេះសំណាល និងនាំយកអំណោយមនុស្សធម៌ របស់សាខាកាកបាទក្រហមខេត្តត្បូងឃ្មុំ ទៅចែកផ្តល់ជូនដល់គ្រួសារជនងាយរងគ្រោះ ជាចាស់ជរាគ្មានទីពឹង ស្ត្រីមេម៉ាយ ជនពិការ និងគ្រួសារក្រីក្រចំនួន ៥៤គ្រួសារ មកពី៧ភូមិ ក្នុងឃុំជាំ ស្រុកមេមត់ ខេត្តត្បូងឃ្មុំ ។

ក្នុងឱកាសនោះ ឯកឧត្តមបណ្ឌិត ជាម ច័ន្ទសោភ័ណ បានពាំនាំនូវប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្ដាំផ្ញើសួរសុខទុក្ខ ក្តីនឹករលឹក អាណិតស្រឡាញ់ យ៉ាងជ្រាលជ្រៅ និងបាននាំយកអំណោយសម្រាលការលំបាកសម្រាប់ ចែកជូនប្រជាពលរដ្ឋទាំងអស់។

ឯកឧត្តមបណ្ឌិត ជាម ច័ន្ទសោភ័ណ ក៏បានអំពាវនាវដល់អាជ្ញាធរក្នុងមូលដ្ឋានមេឃុំមេភូមិ ត្រូវប្រមូលព័ត៍មានថា ប្រជាពលរដ្ឋណាខ្លះដែលក្រីក្រលំបាក និងជួបបញ្ហានានា សូមរាយការណ៍ទៅអភិបាលក្រុងស្រុក រឺលោកផ្ទាល់ ដើម្បីឲ្យលោកបានដឹង និងជួយបងប្អូនទាន់ពេលវេលា ដោយមិនទុក្ខឲ្យនៅកំព្រា រងារម្នាក់ឯងនោះឡើយ។

បើតាមរបាយការណ៍លោក រស់ សុខន ឲ្យដឹងថា ចំពោះអំណោយដែលចែកជូនទាំង៥៤គ្រួសារ ក្នុង១គ្រួសារៗ ទទួលបាន អង្ករ២៥គីឡូក្រាម, មី១កេស, ត្រីខ១០កំប៉ុង, ទឹកត្រី១យួរ, ទឹកស៊ីអ៊ីវ១យួរ, ទឹកសុទ្ធ១កេស, ប្រេងឆា២ដប អាវយឺត៥អាវ និងថវិការ៣ម៉ឺនរៀល ព្រមទាំងសំលៀកបំពាក់២កំប្លេរ និងរទេះរុញ១គ្រឿង ដល់កុមារពិការផងដែរ។

តមកឯកឧត្តមបណ្ឌិត ជាម ច័ន្ទសោភ័ណ និងលោកជំទាវ ព្រមទាំងសហការី បានចុះពិនិត្យមណ្ឌលសុខភាពឃុំជាំ ដែលទើបសាងសង់រួច ព្រមទាំងសំណេះសំណាល ចែកថវិការដល់លោកគ្រូអ្នកគ្រូពេទ្យ និងផ្តាំផ្ញើរឲ្យយកចិត្តទុកដាក់ ពិនិត្យព្យាបាល ពលរដ្ឋឲ្យបានល្អប្រកបដោយវិជ្ជាជីវ: និងក្រមសីលធម៍ខ្ពស់ផងដែរ៕