អាជ្ញាធរខេត្តត្បូងឃ្មុំ ចុះកាត់ផ្ទាំងប៉ាណូកាត់ទទឹងផ្លូវ ដែលគ្មានលិខិតអនុញ្ញាត ហួសសុពលភាព និងចាស់ទ្រុឌទ្រោម នៅតាមដងផ្លូវជាតិលេខ០៧
- Details
- Category: Provincial News
ព្រឹកថ្ងៃទី ១៦ ខែកុម្ភៈ ឆ្នាំ ២០២១ លោក ម៉ៅ ឌុង នាយករដ្ឋបាលសាលាខេត្តត្បូងឃ្មុំ បានអញ្ជើញដឹកនាំកិច្ចប្រជុំ ពិនិត្យវាយតម្លៃផលប៉ះពាល់ផ្សេងៗ ដើម្បីដាក់បញ្ចូលសៀវភៅគំរូប្លង់ ប៉ាណូ
និងរបាកាត់ទទឹងផ្លូវ ផ្សព្វផ្សាយ ពាណិជ្ជកម្មគ្រប់ប្រភេទ ក្នុងខេត្តត្បូងឃ្មុំ ។
កិច្ចប្រជុំនេះ ត្រូវបានធ្វើឡើងនៅសាលប្រជុំសាលាក្រុងសួង ដោយមានការចូលរួមពីសំណាក់ លោក នាយករងរដ្ឋបាលសាលាខេត្ត ប្រធានមន្ទីរជំនាញពាក់ព័ន្ធ អភិបាល អភិបាលរងក្រុង និងមន្រ្តីពាក់ព័ន្ធ ជាច្រើនរូប។
នាឱកាសនោះ លោក ម៉ៅ ឌុង បានមានប្រសាសន៍ថា កិច្ចប្រជុំនាពេលនេះ គឺដើម្បីចុះពិនិត្យ វាយតម្លៃ ផលប៉ះពាល់ផ្សេងៗ ដើម្បីដាក់បញ្ចូលសៀវភៅគំរូប្លង់ ប៉ាណូ និងរបាកាត់ទទឹងផ្លូវ ផ្សព្វផ្សាយពាណិជ្ជកម្មគ្រប់ប្រភេទ ក្នុងខេត្តត្បូងឃ្មុំ ជាការចូលរួមរៀបចំសោភ័ណភាព សណ្ដាប់ធ្នាប់ របៀបរៀបរយតាមទីសាធារណៈ របស់ខេត្តត្បូងឃ្មុំ ។
លោកនាយករដ្ឋបាលសាលាខេត្ត បានលើកឡើងបន្តថា កិច្ចប្រជុំក្រុមការងារគណកម្មាការនេះ គឺដើម្បីពិភាក្សារកដំណោះស្រាយស្វែងរកគន្លឹះមួយចំនួន ធ្វើយ៉ាងណា ដើម្បីសម្របសម្រួល ផលប៉ះពាល់ ផ្សេងៗ តាមរយៈការសហការ ជាមួយស្ថាប័នមន្ទីរជំនាញពាក់ព័ន្ធ និងតាមបណ្ដាក្រុង/ស្រុក ដែលបានកំពុងធ្វើការផ្សព្វផ្សាយជាច្រើននេះតាមរយៈការសុំសិទ្ធិ និងបន្តសុពលភាព ចំពោះផ្ទាំងផ្សព្វផ្សាយពាណិជ្ជកម្មគ្រប់ប្រភេទ ។
លោក ម៉ៅ ឌុង បន្ថែមថា សម្រាប់រដ្ឋបាលខេត្ត ផ្អែកតាមវិធានការ របស់រាជរដ្ឋាភិបាលកម្ពុជា ត្រូវអនុវត្តន៍ ដោយស្មារតីទទួលខុសត្រូវខ្ពស់ និងចាត់វិធានការទាន់ពេលវេលា ដោយក្រុមការងារពាក់ព័ន្ធ ត្រូវធ្វើប្រតិបត្តិការរុះរើ និងកាត់ចោលនូវផ្ទាំងប៉ាណូ របាកាត់ទទឹងផ្លូវ ផ្សព្វផ្សាយពាណិជ្ជកម្មគ្រប់ប្រភេទទាំងឡាយណា ដល់អនុលោមទៅតាមច្បាប់ជាធរមាន ។
បន្ទាប់ពីចប់កិច្ចប្រជុំ ភ្លាមៗក្រុមការងារ បានចុះរុះរើ ផ្ទាំងរបាកាត់ទទឹងផ្លូវ បានចំនួន ៤ផ្ទាំង ក្នុងក្រុងសួង គឺដើម្បីរៀបចំសណ្ដាប់ធ្នាប់ និងសោភ័ណ្ឌភាពនៅតាមដងផ្លូវសាធារណៈ ដែលក្រុមហ៊ុនម្ចាស់ការផ្សព្វផ្សាយគ្មានលិខិតអនុញ្ញាត ឬផុតសុពលភាព និងរបាប៉ាណូ មានលក្ខណៈចាស់ទ្រុឌទ្រោម ជៀសវាងបង្ករគ្រោះថ្នាក់ ជាយថាហេតុ ចំពោះអ្នកធ្វើដំណើរលើផ្លូវសាធារណៈ ៕
