ចាប់បានប្រពន្ធប្តីកំពុងគេចខ្លួន ពាក់ព័ន្ធរឿងចេញសែកស្អុយចំនួន៣៥ម៉ឺនដុល្លារអាមេរិក
- Details
- Category: Social Security News
រាជធានីភ្នំពេញ ៖ សេចក្តីរាយការណ៍បឋមឲ្យដឹងថា ស្ត្រីម្នាក់ដែលជាអនិជនខ្មែររស់នៅក្រៅប្រទេស កាលពីថ្ងៃទី៨ ខែកញ្ញា ឆ្នាំ២០២០ ត្រូវបានកម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ ឃាត់ខ្លួនពាក់ព័ន្ធករណីចេញមូលប្បទានបត្រអត់សាច់ប្រាក់(សែកស្អុយ)ចំនួន៣៥ម៉ឺនដុល្លារអាមេរិក។
ស្ត្រីជាប់សង្ស័យឈ្មោះ ហុក ផល្លា អាយុ៤៧ ឆ្នាំស្នាក់នៅផ្ទះលេខ២ ផ្លូវលេខ៧ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។បើតាមមន្ត្រីនគរបាលព្រហ្មទណ្ឌឲ្យដឹងថា ស្ត្រីឈ្មោះ ហុក ផល្លា ត្រូវបានសមត្ថកិច្ចឃាត់ខ្លួនលើកមុនម្តងរួចហើយ ពាក់ព័ន្ធលើបណ្តឹងរបស់លោក ហ៊ាង រតនា ករណីឆបោក.ដាក់ប្លង់ដីបញ្ចាំយកប្រាក់៤០ម៉ឺនដុល្លារអាមេរិក ប៉ុន្តែប្លង់ដីនោះជាប្លង់ដីខ្យល់។
បន្ទាប់មកដើមបណ្តឹងបានប្តឹងសមត្ថកិច្ចរហូតមានការឃាត់ខ្លួនស្ត្រីឈ្មោះ ហុក ផល្លា តែពេលនោះប្តីអ្នកស្រីដែលមានឈ្មោះ ឃឹម ស្តើង បានយកប្រាក់ចំនួន៥ម៉ឺនដុល្លារទៅដាក់តម្កល់ឲ្យដើមបណ្តឹង ហើយចេញសែកលើទឹកប្រាក់ចំនួន៣៥ម៉ឺនដុល្លារអាមេរិក ដើម្បីធានាប្រពន្ធបាននៅក្រៅឃុំ។ មន្ត្រីនគរបាលបន្តថា មូលប្បទានបត្រដែលមានទឹកប្រាក់៣៥ម៉ឺនដុល្លារ ដែលឈ្មោះ ឃឹម ស្តើង ចេញឲ្យទៅដើមបណ្តឹងនោះជាសែកគ្មានសាច់ប្រាក់ទៅទៀត ម្លោះហើយទើបជនរងគ្រោះសម្រេចិត្តដាក់ពាក្យប្តឹងទៅសមត្ថកិច្ចរហូតមានដីកាពីសាលាដំបូងរាជធានីភ្នំពេញ បញ្ជាឲ្យចូលខ្លួនទាំងពីរនាក់ប្តីប្រពន្ធ ប៉ុន្តែពេលនេះចាប់បានប្រពន្ធ ចំណែកប្តីកំពុងគេចខ្លួន ។
យ៉ាងណាក្តីស្ត្រីជាជនសង្ស័យត្រូវបានសមត្ថកិច្ចកសាងដំណុំរឿងបញ្ជូនទៅកាន់សាលាដំបូងរាជធានីភ្នំពេញ នៅថ្ងៃទី១០ ខែកញ្ញា ឆ្នាំ២០២០ ស្អែកនេះ ដើម្បីបន្តនីតិវិធី៕
ដកស្រង់ពី៖កោះសន្តិភាព