បុរសទាំង៤នាក់ត្រូវអស់លក្ខណ៍ ក្រោយធ្វើសកម្មភាពតាមផ្ទះប្រជាពលរដ្ឋ
- Details
- Category: Social Security News
ខេត្តរតនគិរី ៖ ជនសង្ស័យ៤នាក់ដែលតែងតែដើរលួចគាស់ផ្ទះប្រជាពលរដ្ឋយកទ្រព្យសម្បត្តិនោះ ពេលនេះត្រូវកម្លាំងនគរបាលឃាត់ខ្លួនបញ្ជូនទៅសាលាដំបូងខេត្តហើយ។ ការឃាត់ខ្លួនទាំង៤នាក់នោះ សមត្ថកិច្ចបានធ្វើឡើងនៅកាលម៉ោង៦និង៣០នាទីល្ងាច ថ្ងៃទី៧ ខែ កញ្ញា ឆ្នាំ២០២០ ស្ថិតនៅក្នុងភូមិទេសអន្លុង សង្កាត់បឹងកន្សែង ក្រុងបានលុងខេត្តរតនគិរី។ប្រតិបត្តិការឃាត់ខ្លួនខាងលើ ដោយមានការសម្របសម្រួលពីលោក លាង អ៊ូ ព្រះរាជអាជ្ញារងអមសាលាដំបូងខេត្ត។
ជនសង្ស័យទាំង៤នាក់ត្រូវឃាត់ខ្លួនទាំង៤នាក់ខាងលើមាន៖ ១-ឈ្មោះ គង់ ដាលីម (ហៅ លីន) ភេទប្រុស អាយុ២៣ឆ្នាំ បច្ចុប្បន្ននៅ ភូមិភ្នំស្វាយ សង្កាត់បឹងកន្សែង ក្រុងបានលុង ខេត្តរតនគិរី មុខរបរមិនពិតប្រាកដ ។ ២-ឈ្មោះ ពៅ មាស (ហៅយ៉ាង) ភេទប្រុស អាយុ២៨ឆ្នាំ មានទីលំនៅនិងមុខរបរមិនពិតប្រាកដ។
៣-ឈ្មោះ ឌី ជេម (ហៅជេម) ភេទប្រុស អាយុ២៩ឆ្នាំ ជនជាតិឡាវ មានទីលំនៅ និងមុខរបរមិនពិតប្រាកដ និង៤-ឈ្មោះ រាជ រស្មី (ហៅខ្លី) ភេទប្រុស អាយុ៣១ឆ្នាំ បច្ចុប្បន្ននៅភូមិ៧មករា សង្កាត់ឡាបានសៀក ក្រុងបានលុង មុខរបរមិនពិតប្រាកដ។បើតាមប្រភពពីនគរបាលបានឱ្យដឹងថា ជនសង្ស័យទាំង៤នាក់នេះ បានធ្វើសកម្មភាពលួចគាស់ផ្ទះប្រជាពលរដ្ឋមួយកន្លែងកាលពីថ្ងៃទី៤ ខែកញ្ញា ឆ្នាំ២០២០ កន្លងមក ស្ថិតនៅភូមិទេសអន្លុង សង្កាត់បឹងកន្សែង ក្រុងបានលុងខេត្តរតនគិរី។ ក្រោយពីឃាត់ខ្លួន និងធ្វើតេស្តរកសារធាតុញៀនលើជនសង្ស័យទាំង៤នាក់ គឺរកឃើញថា ទទួលបានលទ្ធផលវិជ្ជមាន ទាំងអស់គ្នា។
ចំណែកវត្ថុតាងដែលសមត្ថកិច្ចដកហូតបាន ៖ ១-រថយន្តមួយគ្រឿងម៉ាកតូយូតាកាមរី ពណ៌សំបកឪឡឹក ពាក់ស្លាកលេខព្រៃវែង 2A-0431។ ២- ឆ្នាំងដាំបាយអគ្គិសនី ម៉ាក តូស៊ីបា ចំនួនមួយ និង៣-ឈើស៊ុមទ្វារមួយចំនួនទៀតផងដែរ។ក្រោយការចាប់ខ្លួន ជនសង្ស័យ និងវត្ថុតាង ត្រូវបានឃាត់ទុកជាបណ្តោះអាសន្ននៅអធិការដ្ឋាននគរបាលក្រុងបានលុង ដើម្បីកសាងសំណុំរឿងបញ្ជូនទៅអយ្យការអមសាលាដំបូងខេត្ត ចាត់វិធានការទៅតាមនីតិវិធីច្បាប់៕
ដកស្រង់ពី៖កោះសន្តិភាព