ជួបសម្លាប់ ដែលសារភាពថា ជាអ្នកបាញ់សម្លាប់ លោកបណ្ឌិត កែម ឡី ត្រូវតុលាការ កាត់ទោសព្រឹកនេះ
- Details
- Category: Social Security News
ភ្នំពេញ៖ អឿត អាង ហៅជួប សម្លាប់ ដែលសារភាព គ្រប់ដំណាក់កាល ថា ជាអ្នកបាញ់សម្លាប់ លោកបណ្ឌិត កែម ឡី អ្នកវិភាគនយោបាយ ត្រូវបានសាលាដំបូង រាជធានីភ្នំពេញ កាត់ទោស នាព្រឹកថ្ងៃទី០១ ខែមីនា នេះ ។
ជនជាប់ចោទមាន មេធាវីការពារក្ដីតាម ផ្លូវច្បាប់ គឺ លោកយុង ផានិត ប្រធាននាយកដ្ឋាន ការពារក្ដីជូនជនក្រីក្រ នៃគណៈមេធាវី ។
សវនាការនេះ ដឹកនាំដោយលោក លាង សំណាត់ អនុប្រធានសាលាដំបូង រាជធានីភ្នំពេញ និង លោក លី សុផាណា ជាតំណាងអយ្យការ ។
មន្ត្រីតុលាការ បញ្ជាក់ថា ជនជាប់ចោទ អឿត អាង ហៅជួប សម្លាប់ ត្រូវបានចោទប្រកាន់ ពីរបទល្មើស គឺ បទឃាតកម្មគិតទុកជាមុន និង បទបទកាន់កាប់ ឬ ដឹកជញ្ជូនអាវុធ ដោយគ្មានការអនុញ្ញាត តាមមាត្រា២០០ និង ៤៩០នៃក្រមព្រហ្មទណ្ឌ ។បទល្មើសនេះកំណត់ ការផ្តន្ទាទោសដាក់ពន្ធនាគារ អស់មួយជីវិត ។
គួរបញ្ជាក់ថា អឿត អាង ហៅជួប សម្លាប់ ត្រូវបានសមត្ថកិច្ចឃាត់ ខ្លួនភ្លាមៗ ក្រោយពីបាញ់សម្លាប់ លោកបណ្ឌិត កែម ឡី កាលពីវេលាម៉ោង៨៖៥០នាទី ព្រឹកថ្ងៃទី១០ខែកក្កដា ឆ្នាំ២០១៦ នៅចំណុចក្នុងទីតាំង ស្តារម៉ាត នៃស្ថានីយប្រេងឥន្ធនៈ កាល់តិច បូកគោ ស្ថិតនៅកាច់ជ្រុង មហាវិថីព្រះមុនីវង្ស និង មហាវិថីម៉ៅសេទុង ក្នុងសង្កាត់ទន្លេបាសាក់ ខណ្ឌចំការមន ៕
ដកស្រង់ពី៖ដើមអម្ពិល