Zidane ថាអត់ដូរសោះ រឿងថាឱ្យអាជ្ញាកណ្ដាលកាន់ជើង Real Madrid
- Details
- Category: Sport News
ក្រោយពីក្រុម Real Madrid បានយកឈ្នះលើក្រុម Athletic Club ក្នុងលទ្ធផល ១-០ កាលពីម្សិលមិញមក មានការរិះគន់ជាច្រើនថាអាជ្ញាកណ្ដាលកាន់ជើងក្រុម Real Madrid នៅរដូវកាលនេះ។
ការអះអាងថាអាជ្ញាកណ្ដាលកាន់ជើងនេះ គឺកើតឡើងក្រោយពីក្រុម Real Madrid ទទួលបានបាល់ពិន័យ១១ម៉ែត្រ២ប្រកួតជាប់គ្នាតែម្ដងនៅចុងម៉ោង ហើយក៏ជាបាល់នាំឱ្យពួកគេទទួលបានជ័យជម្នះ ទាំងពីរប្រកួតនោះដែរ។
ការរិះគន់បែបនេះហើយ បានធ្វើឱ្យលោក Zidane អ្នកចាត់ការក្រុមអធិរាជស និយាយថាលោកហត់នឿយចំពោះការឮដំណឹងបែបនេះណាស់ ព្រោះឱ្យតែក្រុម Real Madrid ឈ្នះគឺចោទអាជ្ញាកណ្ដាលកាន់ជើង តែមិនបានមើលការខិតខំរបស់កីឡាករនោះទេ។
អ្នកចាត់ការសញ្ជាតិបារាំងខាងលើនិយាយទៀតថា៖ “វាមិនប្ដូរទាល់តែសោះ ប៉ុន្តែក្រុមកីឡាករគួរតែទទួលបានការគោរព។ គ្មាននរណាម្នាក់នឹងអាចយកគំនិតរបស់យើងពីគោលដៅយើងបានឡើយ។ ខ្ញុំកំពុងតែហត់នឿយខ្លាំង ចំពោះការឮរឿងថាយើងឈ្នះដោយសារអាជ្ញាកណ្ដាល”។
សូមបញ្ជាក់ថាក្រុម Real Madrid កំពុងនាំមុខក្រុម FC Barcelona ដល់ទៅ៤ពិន្ទុ ហើយការប្រកួតនៅសល់តែ៤ប្រកួតទៀតប៉ុណ្ណោះ។ ៤ប្រកួតនោះដែរ ក្រុមរបស់លោក Zidane ត្រូវការតែ៨ពិន្ទុប៉ុណ្ណោះ ដើម្បីក្លាយជាជើងឯក La Liga នៅរដូវកាលនេះ៕
