Pep៖ កុងត្រារបស់ខ្ញុំនៅ Man City គ្រាន់តែជាក្រដាសមួយសន្លឹកប៉ុណ្ណោះ
- Details
- Category: Sport News
លោកPep Guardiola អ្នកចាត់ការក្លឹប Manchester City បានលើកឡើងប្រាប់សារព័ត៌មាន Marca កាលពីពេលថ្មីៗនេះថា កុងត្រារបស់លោកជាមួយក្លឹប Premier League មួយនេះគ្រាន់តែជាក្រដាសមួយសន្លឹកប៉ុណ្ណោះ។
ការលើកឡើងបែបនេះធ្វើឡើងតែប៉ុន្មានសប្ដាហ៍ប៉ុណ្ណោះ ក្រោយពេលដែលលោកបន្តកុងត្រាថ្មីជាមួយក្លឹប។លោកបាននិយាយថា៖ «នៅពេលណាដែលខ្ញុំមានអារម្មណ៍ថាអ្វីៗមិនដូចការរំពឹងទុក នោះខ្ញុំនឹងលាលែងពីតំណែង ឬ មិនបន្តកុងត្រាថ្មីឡើយ។
ខ្ញុំនឹងមិនបន្តដូច Alex Ferguson ឬ Arsene Wenger ឡើយ។ កុងត្រាគ្រាន់តែក្រដាសមួយសន្លឹកសម្រាប់ខ្ញុំប៉ុណ្ណោះ»។ «ខ្ញុំបន្តកុងត្រាជាមួយក្លឹប ដោយសារតែខ្ញុំគិតថា ក្រុមរបស់យើងអាចបន្តដំណើរជាមួយគ្នាបាន ក្រោមការដឹកនាំរបស់ខ្ញុំ។ នៅចុងក្រោយ វាជារឿងលទ្ធផល ហើយប្រសិនបើយើងហត់ចិត្តនឹងគ្នា នោះខ្ញុំនឹងមិនបន្តដល់ចប់កុងត្រានោះទេ»។ នេះជាការលើកឡើងរបស់លោក។
លោក Pep ធ្លាប់និយាយថា លោកឈ្នះពានអស់ហើយជាមួយ Man City នៅឡើយតែពាន UEFA Champions League ប៉ុណ្ណោះ។ បុរសមកដែនដីកាតាឡាន់មួយនេះមានអាជីពជាគ្រូបង្វឹកគួរឱ្យចាប់អារម្មណ៍មួយ ដោយលោកដឹកនាំឈ្នះស្ទើរតែគ្រប់ពានទាំងអស់ជាមួយក្លឹប Barcelona និងក្លឹបអាល្លឺម៉ង់ Bayern Munich មុននឹងមក Man City កាលពីឆ្នាំ២០១៦៕
