Liverpool ជួយ Man City រកឃើញបរាជ័យលើកទីមួយនៅ Premier League

Details

Category: Sport News

Liverpool ទីបំផុតធ្វើឲ្យ Manchester City ទទួលបរាជ័យលើកដំបូងនៅ Premier League រដូវកាលនេះក្រោយ យកឈ្នះក្នុងលទ្ធផល ៤ទល់នឹង៣។ ២២ប្រកួត កន្លងមក ក្រុមរហស្សនាមថា មេឃខៀវមិនដែលស្គាល់រសជាតិចាញ់ នោះទេពោលគឺឈ្នះ២០ និងស្មើ២ យ៉ាងណាកំណត់ត្រាដ៏ល្អឥតខ្ចោះ ត្រូវបញ្ចប់ត្រឹមប្រកួតនៅកីឡដ្ឋាន Anfield។

បរាជ័យនេះក៏ធ្វើឲ្យ Man City ដែលសង្ឃឹមលើកពានខ្ពស់មិនអាចបំបែកកំណត់ត្រាមិនដែលចាញ់ពេញមួយរដូវកាលរបស់ Arsenal ផងដែរ។ គ្រាប់ដំបូងក្នុងការប្រកួតយប់មិញកើតឡើងនៅនាទី ទី៩ជាការអូសស៊ុតរបស់ Chamberlain។ យ៉ាងណាការនាំមុខរបស់ហង្សក្រហមត្រូវរំសាយដោយគ្រាប់បាល់មួយជើងឆ្វេងរបស់ខ្សែបម្រើស្លាប Leroy Sane នៅនាទី៤០។

ចូលវគ្គទីពីរម្ចាស់ផ្ទះបានបើកការវាយលុកសារជាថ្មីហើយនាំមុខម្ដងទៀតនៅនាទី៥៩ ជាថ្វីជើងរបស់ខ្សែប្រយុទ្ធប្រេស៊ីល Firmino ក្រោយតារាឆ្នើមរូបនេះចុចផុតដៃអ្នកចាំទីបញ្ចូលទីយ៉ាងល្អ។ រំលងបាន២ នាទី Sadio Mane បានទាត់ជ្រុងកៅថែមឲ្យ Liverpool នាំមុខមួយគ្រាប់ទៀត។

ប៉ុណ្ណឹងនៅមិនទាន់គ្រប់គ្រាន់ទេ ពោលគឺនាទី៦៧ Mohamed Salah បានចូលខ្លួនក្នុងបញ្ជី អ្នកស៊ុតបញ្ចូលទីនឹងគេដែរ គឺនៅពេលអ្នកចាំទី Ederson ផ្ដាច់បាល់មិនផុតត្រូវខ្សែប្រយុទ្ធសញ្ជាតិអេហ្ស៊ីបទប់បាន និងបណ្ដក់ចូលគ្រាប់ទី៤។ ទោះយ៉ាងនេះក្ដីក្រុមលោក Pep Guardiola នៅតែមិនចុះចាញ់ ហើយសងបាន២គ្រាប់វិញនៅនាទី៨៤ និង៩០ ជាថ្វីជើងរបស់ Bernardo Silva និង Guendogan។

ជ័យជម្នះខាងលើធ្វើឲ្យ Liverpool ហក់មកលេខ៣ក្នុងតារាង ខណ: City មិនបានប្រែប្រួលចំណាត់ថ្នាក់ឡើយតែនឹងបន្ថយគម្លាតពិន្ទុបើ Manchester United ឈ្នះ Stoke City នៅយប់ថ្ងៃច័ន្ទ៕

ដកស្រង់ពី៖ Sabay