Man City ធ្ងន់ក! De Bruyme រងរបួសពេលហាត់អាចសម្រាកពី២ទៅ៤ខែ
- Details
- Category: Sport News
ក្លឹប Manchester City បានប្រកាសឲ្យដឹង ខ្សែបម្រើ Kevin De Bruyne បានទទួលរងរបួសជង្គង់ខាងស្ដាំអំឡុងពេលហ្វឹកហាត់ ហើយតាមប្រភពជិតស្និទ្ធទម្លាយថា គេអាចនឹងសម្រាកចន្លោះពី២ទៅ៤ខែឯណោះ។
កីឡាករវ័យ២៧ឆ្នាំបានរបួស ពេលហាត់កាលពីព្រឹកថ្ងៃពុធ ហើយពេលនេះកំពុងស្ថិតក្នុងដំណាក់កាលធ្វើតេស្តដើម្បីស្វែងយល់ពីទំហំនៃរបួស។ សេចក្ដីថ្លែងការណ៍មួយចេញដោយ Man City ប្រកាសថា De Bruyne របួសជង្គង់ខាងស្ដាំ ពេលហាត់។ ចំពោះទំហំនៃរបួសមិនទាន់ដឹងនៅឡើយទេ ហើយពួកគេនឹងផ្ដល់ព័ត៌មានវិវត្តន៍ថ្មីៗបន្ថែមទៀតចំពោះស្ថានភាពរបស់កីឡាករ។
De Bruyne ទើបតែត្រលប់ចូលរួមជាមួយ Manchester City កាលពីសប្ដាហ៍មុន ក្រោយទទួលបានច្បាប់សម្រាកបន្ថែម ដោយសារទើបនឿយហត់ជាមួយជម្រើសជាតិបែលហ្ស៊ិកនៅព្រឹត្តិការណ៍ World Cup។ កាលពីឆ្នាំ២០១៦ គេធ្លាប់របួសជង្គង់ខាងស្ដាំម្ដងហើយ ពេលនោះអវត្តមានដល់១២ប្រកួត៕
ដកស្រង់ពី៖ Sabay