ទីក្រុងភ្នំពេញនឹងមាន “Pub Street” នៅចុងឆ្នាំនេះ ដើម្បីបង្កើនជម្រើសដំណើរកម្សាន្តក្នុងពេលរាត្រី
- Details
- Category: ព័ត៌មានទេសចរណ៍
កិច្ចពិភាក្សាស្តីពីការបង្កើត Pub Street នៅក្នុងទីក្រុងភ្នំពេញត្រូវបានលើកឡើងនៅក្នុងកិច្ចប្រជុំការងាររបស់រដ្ឋបាលរាជធានីភ្នំពេញកាលពីសប្តាហ៍មុនក្រោមអធិបតីភាពរបស់លោក ឃួង ស្រេង អភិបាលរាជធានីភ្នំពេញដោយលោកបានបញ្ជាក់ថាគម្រោងទាំងមូលនឹងរួចរាល់នៅចុងឆ្នាំនេះ។
តំបន់ Pub Street ត្រូវបានបង្កើតឡើងក្នុងគោលបំណងផ្តល់នូវទីតាំងកម្សាន្តក្នុងពេលរាត្រីដែលត្រូវបានកែលម្អ និងពង្រីកសម្រាប់អ្នកសម្រាកលំហែកាយទាំងក្នុងស្រុក និងអន្តរជាតិ ក៏ដូចជាជំរុញដល់ឧស្សាហកម្មទេសចរណ៍ក្នុងទីក្រុងភ្នំពេញដែលកំពុងរីកចម្រើនយ៉ាងឆាប់រហ័ស។
លោក ឃួង ស្រេង អភិបាលរាជធានីភ្នំពេញបានលើកឡើងថា រដ្ឋបាលរបស់លោកបានបញ្ចប់ការសិក្សាលទ្ធភាពសម្រាប់គម្រោងនេះរួចហើយ ហើយឥឡូវនេះកំពុងផ្តោតលើការអនុវត្ត។
ក្នុងជំនួបជាមួយអាជ្ញាធរពាក់ព័ន្ធ លោកអភិបាលខេត្តបានជំរុញឱ្យមន្ទីរសាធារណការ និងដឹកជញ្ជូន ចាប់ផ្តើមជួសជុលជាការងារចាំបាច់សម្រាប់សម្ពោធគម្រោងនេះក្នុងរយៈពេលប្រាំមួយខែ។
លោកអភិបាលបានកត់សម្គាល់ថា តំបន់ Pub Street ថ្មីនៅទីក្រុងភ្នំពេញនេះ ត្រូវបានរំពឹងថានឹងសាងសង់រួចរាល់មុនពិធីបុណ្យចូលឆ្នាំថ្មីប្រពៃណីជាតិឆ្នាំ២០២៥។
យោងតាមផែនការរបស់រដ្ឋបាលរាជធានីភ្នំពេញ តំបន់ Pub Street និងផ្លូវថ្មើរជើងនឹងមានទីតាំងនៅទល់មុខការិយាល័យប្រៃសណីយ៍កម្ពុជា ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។
ទីតាំងនេះអនុញ្ញាតឱ្យអ្នកទេសចរអាចដើរកម្សាន្តនៅតាមតំបន់មាត់ទន្លេមេគង្គ និងទន្លេបាសាក់ ហើយក៏នៅជិតផ្សាររាត្រីរបស់រាជធានីភ្នំពេញផងដែរ ដែលជាផ្សារទាក់ទាញភ្ញៀវទេសចរជាតិ និងអន្តរជាតិរាប់ពាន់នាក់សម្រាប់ការដើរទិញឥវ៉ាន់ និងបរិភោគអាហារ។
យោងតាមផែនការលម្អិតរបស់មន្ទីរសាធារណការ និងដឹកជញ្ជូនរាជធានីភ្នំពេញ កាលពីសប្តាហ៍មុន ផ្លូវថ្មើរជើងរាជធានីភ្នំពេញ បែងចែងជា ៣ តំបន់ មានទំហំ ៥៧ ហិកតា។
តំបន់ទី១ មានផ្ទៃដីទំហំ ៣.៣ ហិចតា នឹងមានទីតាំងនៅទល់មុខប្រៃសណីយ៍ ព្រំប្រទល់ជាប់ផ្លូវលេខ ៩៤ ខាងជើង ផ្លូវលេខ ១០៦ ខាងត្បូង ផ្លូវលេខ ១៣ ខាងលិច និងផ្លូវព្រះស៊ីសុវត្ថិ ខាងកើត។
តំបន់ទី ត្រូវបានរចនាឡើងជាតំបន់ពាណិជ្ជកម្ម ហើយនឹងត្រូវបានរៀបចំឡើងវិញជាផ្លូវលក់អាហារ និងផ្សារទំនើប។
តំបន់ទី២ មានផ្ទៃដីសរុប ២០,៧ ហិកតា ជាប់ផ្លូវលេខ ១០៦ ទៅខាងជើង ផ្លូវ ១៨៤ ទៅខាងត្បូង ផ្លូវលេខ ១៣ ទៅខាងលិច និងផ្លូវព្រះស៊ីសុវត្ថិ ខាងកើត និងក្លាយជាតំបន់អាហារ និងភេសជ្ជៈ ហើយនឹងត្រូវបានគេស្គាល់ថាជា Pub Street បន្ទាប់ពីការបើកដំណើរការ។
តំបន់ទី៣ នឹងត្រូវកំណត់ជាតំបន់ទេសចរណ៍ដែលមានផ្ទៃដីសរុប ៣៤ ហិកតា ជាប់ព្រំប្រទល់ផ្លូវលេខ១៨៤ ខាងជើង មហាវិថីព្រះសីហនុ ខាងត្បូង ផ្លូវលេខ៧ ខាងលិច និងផ្លូវព្រះស៊ីសុវត្ថិ ខាងកើត។
ក្នុងរយៈពេលប្រាំមួយខែខាងមុខ អាជ្ញាធររាជធានីភ្នំពេញមានបំណងបញ្ចប់ផែនការកែប្រែតំបន់នេះ រួមទាំងការកែលម្អចិញ្ចើមផ្លូវ ផ្លូវចេញចូល តំបន់បៃតង និងសួនច្បារ បង្គន់អនាម័យ និងចំណតរថយន្ត រួមជាមួយនឹងការជួលហាង ភោជនីយដ្ឋាន សណ្ឋាគារ និងបារ។
នៅពេលដែលគម្រោងអភិវឌ្ឍន៍ត្រូវបានបញ្ចប់ តំបន់នេះនឹងបើកឱ្យភ្ញៀវជាតិ និងអន្តរជាតិចូលទិញទំនិញ ពិសារអាហារ ដោយរំពឹងថានឹងមានចរាចរណ៍រវល់បំផុតចាប់ពីម៉ោង៦ដល់ម៉ោង១១ យប់។
គម្រោងនេះត្រូវបានបង្កើតឡើងបន្ទាប់ពីភាពជោគជ័យរបស់ Pub Street នៅក្នុងខេត្តសៀមរាប។
តំបន់ Pub Street គឺជាតំបន់កម្សាន្តពេលរាត្រីដ៏ពេញនិយមនៅក្នុងខេត្តសៀមរាប ដែលបានទាក់ទាញអ្នកទស្សនារាប់សែននាក់ជាបន្តបន្ទាប់ក្នុងអំឡុងពេលថ្ងៃឈប់សម្រាកជាតិ និងអន្តរជាតិក្នុងរយៈពេលមួយទសវត្សរ៍មុន។
ដូច្នេះហើយ តំបន់ Pub Street នៅក្នុងខេត្តសៀមរាបបានក្លាយជាគោលដៅទី២សម្រាប់អ្នកធ្វើដំណើរបន្ទាប់ពីប្រាសាទអង្គរវត្ត។
ជាឧទាហរណ៍ ក្នុងអំឡុងពិធីបុណ្យចូលឆ្នាំថ្មី ប្រពៃណីជាតិ ឆ្នាំ២០២៣ ខេត្តសៀមរាប បានកត់ត្រាភ្ញៀវទេសចរជាង ៣០០.០០០ នាក់ដែលភាគច្រើនចូលចិត្តទៅកម្សាន្តនៅតំបន់ Pub Street ។
ផែនការបង្កើតតំបន់កម្សាន្តពេលរាត្រីនៅកណ្តាលទីក្រុងភ្នំពេញគឺដើម្បីទាក់ទាញភ្ញៀវកាន់តែច្រើនមកទីក្រុងភ្នំពេញ ជាពិសេសក្នុងអំឡុងពេលនៃការធ្វើដំណើរកម្សាន្ត និងការប្រារព្ធពិធីផ្សេងៗ ដូចជាពិធីបុណ្យចូលឆ្នាំសកល និងបុណ្យចូលឆ្នាំចិនជាដើម។
ដកស្រង់ពី៖ ខ្មែរថាមស៍