ក្រុមហ៊ុនអាកាសចរណ៍ Emirates Airlines បានបើកជើងហោះហើរឡើងវិញមកកម្ពុជា
- Details
- Category: ព័ត៌មានទេសចរណ៍
នៅថ្ងៃពុធនេះ ក្រុមហ៊ុនអាកាសចរណ៍ Emirates Airlinesបានបើកជើងហោះហើរឡើងវិញមកកម្ពុជា បន្ទាប់ពីជំងឺកូវីដ-១៩បានស្រាកស្រាន្ត ដោយផ្តល់ជូននូវបទពិសោធន៍ធ្វើដំណើរលំដាប់ពិភពលោកនៃការតភ្ជាប់ផ្លូវអាកាសរវាងទីក្រុងឌូបៃ និងទីក្រុងភ្នំពេញ តាមរយៈប្រទេសសិង្ហបុរី។
ពិធីស្វាគមន៍ការហោះហើរមកកាន់រាជធានីភ្នំពេញឡើងវិញរបស់ក្រុមហ៊ុនអាកាសចរណ៍ Emirates បានធ្វើឡើងនៅថ្ងៃទី១ ខែឧសភា នៅអាកាសយានដ្ឋានអន្តរជាតិភ្នំពេញ ដោយអ្នកដំណើរនៅលើយន្តហោះទទួលបានអំណោយ រួមទាំងផ្កា និងក្រមាខ្មែរ នៅក្នុងឱកាសនេះ។
មានជើងហោះហើរចំនួនប្រាំពីរដែលបានគ្រោងទុកក្នុងមួយសប្តាហ៍ ដោយប្រើប្រាស់យន្តហោះ Boeing 777។
យោងតាមក្រុមហ៊ុន Emirates ក្រុមហ៊ុននឹងប្រើប្រាស់យន្តហោះ Boeing 777-300ER ដែលនឹងផ្តល់ជូនបន្ទប់ឯកជនលំដាប់ទីមួយចំនួនប្រាំបី កៅអីថ្នាក់អាជីវកម្មចំនួន៤២កៅអី និងកៅអីថ្នាក់ធម្មតាចំនួន ៣១០ កៅអីដែលមានភាពធំទូលាយ។
លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលបាននិយាយថា នេះគឺជាព្រឹត្តិការណ៍ដ៏គួរឱ្យកត់សម្គាល់មួយ ដែលបង្ហាញពីការអនុវត្តបន្ថែមទៀតនូវគោលនយោបាយបើកចំហជើងមេឃប្រកបដោយការគិតគូររបស់រដ្ឋាភិបាលកម្ពុជា។
លោកបានបន្តថា “ការហោះហើរត្រង់នេះនឹងនាំមកនូវអត្ថប្រយោជន៍ និងវិបុលភាពទៅវិញទៅមកដល់សេដ្ឋកិច្ច ទេសចរណ៍ និងការដឹកជញ្ជូនតាមផ្លូវអាកាសនៃប្រទេសរបស់យើងទាំងពីរ” ។
Emirates Airlinesគឺជាក្រុមហ៊ុនអាកាសចរណ៍ទីពីរដែលបានហោះហើរពីមជ្ឈិមបូព៌ាមកកាន់ប្រទេសកម្ពុជា ហើយជាក្រុមហ៊ុនអាកាសចរណ៍បរទេសទី២៨ ដែលហោះហើរមកកាន់ប្រទេសកម្ពុជា នេះបើយោងតាម SSCA ។
រដ្ឋាភិបាលកម្ពុជា និងរដ្ឋាភិបាលនៃអេមីរ៉ាតអារ៉ាប់រួមបាននឹងកំពុងខិតខំនាំយកកិច្ចសហប្រតិបត្តិការកាន់តែជិតស្និទ្ធលើគ្រប់វិស័យ រួមទាំងវិស័យពាណិជ្ជកម្ម និងអាកាសចរណ៍ស៊ីវិលផងដែរ ដែលក្នុងនោះ រដ្ឋាភិបាលទាំងពីរបានបញ្ចប់ការចរចារកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា-អេមីរ៉ាតអារ៉ាប់រួម ដែលបានចុះហត្ថលេខានៅថ្ងៃទី ០៨ ខែមិថុនា ឆ្នាំ ២០២៣ និងកិច្ចព្រមព្រៀងសេវាកម្មផ្លូវអាកាសរវាងកម្ពុជា និងអេមីរ៉ាតអារ៉ាប់រួម ដែលបានចុះហត្ថលេខាកាលពីថ្ងៃទី ៩ ឧសភា ឆ្នាំ ២០១៣។
កិច្ចព្រមព្រៀងដែលបានរៀបរាប់ខាងលើបានរួមចំណែកយ៉ាងធំធេងដល់ការវិនិយោគ ពាណិជ្ជកម្ម ទេសចរណ៍ និងជាពិសេសបានជួយនាំមកនូវការតភ្ជាប់ផ្លូវអាកាសដោយផ្ទាល់រវាងប្រទេសកម្ពុជា និងអេមីរ៉ាតអារ៉ាប់រួម។
ដកស្រង់ពី៖ ខ្មែរថាមស៍