អាហ្សែបៃហ្សង់ «លុបចោលកិច្ចសន្យាទិញយន្តហោះ 737 MAX ចំនួន១០គ្រឿងពី Boeing» ព្រោះតែខ្លាចបញ្ហាសុវត្ថិភាព

សេចក្ដីលម្អិត

ជំពូក៖ ព័ត៌មានអន្តរជាតិ

(អាហ្សែបៃហ្សង់)៖ អាកាសចរណ៍អាហ្សាល់ (Azal) នៃប្រទេសអាហ្សែបៃហ្សង់ បានសម្រេចលុបចោល កិច្ចព្រមព្រៀងតម្លៃ  ១ពាន់លានដុល្លារ ក្នុងការបញ្ជាទិញយន្តហោះ ប្រភេទ 737 MAX របស់ក្រុមហ៊ុនអាមេរិក Boeing ក្រោយពីអាជ្ញាធរអាកាសចរណ៍អាមេរិក  FAA បានចេញរបាយការណ៍ ស៊ើបអង្កេតជាបឋមថា ផ្នែកស្លាបរបស់យន្តហោះប្រភេទនេះ ដែលត្រូវបានផលិតរួចទៅហើយ ចំនួនជាង ៣០០គ្រឿង ទំនងជាមានបញ្ហា។

នេះបើតាមការចេញផ្សាយ ដោយទីភ្នាក់ងារព័ត៌មាន Reuters នារសៀលថ្ងៃពុធ ទី០៥ ខែមិថុនា ឆ្នាំ២០១៩។

ការចេញផ្សាយព័ត៌មានខាងលើនេះ ក៏ស្របនឹងសេចក្តីរាយការណ៍ពី Boeing ផងដែរថា ចាប់តាំងពីការផ្អាក ធ្វើប្រតិបត្តិការនៃយន្តហោះប្រភេទ Boeing 737 MAX នៅទូទាំងពិភពលោក ក្រោយពីការធ្លាក់យន្តហោះនៅឥណ្ឌូណេស៊ី និងអេត្យូពី ដែលបានសម្លាប់មនុស្ស ៣៤៦នាក់នោះ គ្មានអាកាសចរណ៍បរទេសណា ឬសូម្បីតែក្នុងស្រុក បានបញ្ជាទិញ យន្តហោះប្រភេទនេះទៀតឡើយ ខណៈវាជាប្រភេទ យន្តហោះស៊េរីថ្មី  ដែលបាន បំបែកកំណត់ត្រាលក់ដាច់បំផុត ក្នុងប្រវត្តិសាស្ត្រលក់របស់ Boeing រួចទៅហើយនោះ។

គួរបញ្ជាក់ថា ការលុបចោលកិច្ចព្រមព្រៀងទិញ Boeing 737 MAX ចំនួន ១០គ្រឿង ពីសំណាក់អាកាសចរណ៍អាហ្សែបៃហ្សង់ ខាងលើនេះ គឺស្ថិតក្រោមហេតុផល ព្រួយបារម្ភអំពី សុវត្ថិភាព ខណៈដែលបញ្ហាជាក់លាក់ នៃយន្តហោះប្រភេទនេះ នៅតែមិនទាន់បង្ហាញចេញនោះ។

ដោយឡែក កាលពីដើមសប្តាហ៍នេះ ក្រុមហ៊ុន Boeing ក៏បានរំពឹងផងដែរថា ការស៊ើបអង្កេតនឹង ឆាប់បញ្ចប់ ហើយរាល់យន្តហោះ 737 MAX ទាំងអស់នឹងអាចដំណើរការឡើងវិញ នៅចុងឆ្នាំ២០១៩។

យ៉ាងណាក៏ដោយ ការទទួលរងពាក្យបណ្តឹងពីអតិថិជន និងជនរងគ្រោះ ឬក៏យ៉ាងណានោះ ត្រូវរង់ចាំលទ្ធផលផ្លូវការ នៃការស៊ើបអង្កេត ដោយអាជ្ញាធរអាមេរិកជាមុនសិន៕

ដកស្រង់ពី៖ Fresh News