យន្តហោះដឹកជញ្ជូន យោធាអ៊ុយក្រែន មួយគ្រឿងទៀត ត្រូវបាញ់ធ្លាក់ ដោយគ្រាប់មីស៊ីល

សេចក្ដីលម្អិត

ជំពូក៖ ព័ត៌មានអន្តរជាតិ

អ៊ុយក្រែន៖ កងទ័ពអ៊ុយក្រែន កាលពីយប់ ថ្ងៃទី១៤ កក្កដា បានតាមរុករក បណ្តាសមាជិក ក្រុមយានិក នៃយន្តហោះដឹកជញ្ជូន យោធា មួយគ្រឿង ដែលត្រូវបាញ់ធ្លាក់ ក្នុងតំបន់បំបែកខ្លួន ដោយមីស៊ីល ១គ្រាប់ ប្រហែល ជាបាញ់ចេញ មកពីរុស្ស៊ី ដែលប្រការនេះ រឹតតែបង្កើន ភាពតានតឹង ខ្លាំងថែមទៀត រវាងប្រទេសទាំង ២ ។

ក្នុងសេចក្តីប្រកាសមួយ វិមានប្រធានាធិបតី អ៊ុយក្រែន គូសបញ្ជាក់ថា សមាជិក ក្រុមយានិក របស់យន្តហោះធុន AN-26 នោះ ដែលត្រូវផ្ទុះបែក ជាច្រើនបំណែក ហើយត្រូវបាន អ្នកកាសែតរបស់ AFP ប្រទះឃើញក្នុង ចម្ការមួយ ស្ថិតនៅក្បែរភូមិ Davydo Mykiste តំបន់លូហ្គានស្ក៍ បានទាក់ទងជាមួយ សេនាធិការដ្ឋាន កងទ័ព អ៊ុយក្រែន ។

ទោះបីយ៉ាងណា គេពុំដឹងថា តើសមាជិក ក្រុមយានិក ទាំងអស់របស់យន្តហោះ នោះនៅរស់ ឬយ៉ាងណាឡើយ ។ បន្ទាប់មក អ្នកនាំពាក្យយោធា អ៊ុយក្រែន ម្នាក់ ទទួលស្គាល់ថា មនុស្ស២នាក់ ក្នុងចំណោម មនុស្សទាំង៨នាក់ ជិះក្នុងយន្តហោះនោះ ត្រូវចាប់ជាឈ្លើយសឹក ដោយពួកឧទ្ទាម ។

ចំណែកពួកបំបែកខ្លួននិយម ស្និទ្ធរុស្ស៊ី អះអាងថា ចាប់បានឈ្លើយសឹក ៤នាក់ ។ ក្រុង គៀវ វាយតម្លៃភ្លាមៗ ថា រុស្ស៊ី ជាអ្នកទទួល ខុសត្រូវ ចំពោះការវាយប្រហារ ប្រឆាំងយន្តហោះ ដឹកជញ្ជូនយោធានោះ។ ក្នុងសេចក្តីប្រកាសមួយ វិមានប្រធានាធិបតី អ៊ុយក្រែន និយាយថា យន្តហោះ ដែលហោះដល់ កម្ពស់៦.៥០០ម៉ែត្រ គឺមិនអាចបាញ់ត្រូវ ដោយមីស៊ីល ដី-អាកាស យកតាមខ្លួនបានឡើយ មានន័យថា ត្រូវបាញ់ធ្លាក់ ដោយមីសុីលប្រភេទផ្សេងទៀត ដែលខ្លាំងហើយ មីសុីលនោះ ប្រហែលបាញ់ចេញពី ដែនដី នៃសហព័ន្ធរុស្ស៊ី ។ ចំណែកអ្នកនាំពាក្យ យោធាអ៊ុយក្រែន លោក អានឌ្រីយ លូសសេនកូ បញ្ជាក់ថា មីសុីលនោះ អាចជាមីស៊ីល ដី-អាកាស ធុន Pantsir ឬមីសុីលរត់ រកគោលដៅ ដោយស្វ័យប្រវត្តិ ធុន X-24 ដែលអាចបាញ់ចេញពី យន្តហោះ រុស្ស៊ី ១គ្រឿង ដែលហោះចេញពី ព្រលាន យន្តហោះ Millerovo ៕

ដកស្រង់ពី៖ គេហទំព័រ ដើមអំពិល