រថយន្តដឹកទំនិញមានផ្ទុកមនុស្សស្លាប់ចំនួន ៣៩ នាក់ បានចូលពីខាងប្រទេសបែលហ្ស៊ិក

សេចក្ដីលម្អិត

ជំពូក៖ ព័ត៌មានអន្តរជាតិ

ប្រទេសអង់គ្លេស បានបើកការស៊ើបអង្កេតឃាតកម្មដ៏ធំមួយ បន្ទាប់ពីសាកសពមនុស្សចំនួន ៣៩ នាក់ ត្រូវបានរកឃើញកាលពីថ្ងៃពុធ នៅក្នុងរថយន្តបំពាក់ម៉ាស៊ិនក្លាស្សេមួយគ្រឿង ហើយជាថ្មីម្តងទៀតបានដាក់ការចាប់អារម្មណ៍ទៅលើអាជីវកម្មជួញដូរមនុស្ស។

សាកសពទាំងនោះ ត្រូវបានគេរកឃើញនៅក្នុងកុងតឺន័រដឹកទំនិញមួយនៅឯឧទ្យានឧស្សាហកម្មមួយ ក្នុងទីក្រុង Grays ភាគខាងកើតនៃទីក្រុងឡុងដែលបង្កជាកំហឹងក្នុងចំណោមអ្នកនយោបាយ។

កម្លាំងប៉ូលីសក្នុងតំបន់ Essex ដែលកំពុងធ្វើការជាមួយមន្រ្តីអន្តោ-ប្រវេសន៍ បាននិយាយថា អាទិភាពដំបូងរបស់ពួកគេ គឺដើម្បីព្យាយាមកំណត់អត្តសញ្ញាណជនរងគ្រោះ ដែលគិតថានៅដំណាក់កាលនេះមានមនុស្សពេញវ័យចំនួន ៣៨ នាក់ និងក្មេងជំទង់ម្នាក់។

ប៉ូលីស បានបន្ថែមថា អ្នកបើកឡាននោះ ជាបុរសអាយុ ២៥ ឆ្នាំម្នាក់មកពីអៀកឡង់ខាងជើង ត្រូវបានចាប់ខ្លួនពីបទសង្ស័យឃាតកម្មហើយនៅតែស្ថិតក្នុងការឃុំឃាំង រហូតដល់ថ្ងៃពុធ នេះបើតាមការ ផ្សាយរបស់ Channel News Asia នៅថ្ងៃព្រហស្បត្តិ៍។