ចំនួនអ្នកស្លាប់ដោយសារការផ្ទុះឡើងនៃវីរុសនៅប្រទេសចិន បានកើនឡើងដល់ ៨១ នាក់ នៅថ្ងៃច័ន្ទ នៅពេលដែលរដ្ឋាភិបាល បានពន្យារថ្ងៃឈប់សម្រាកចូលឆ្នាំចិន ហើយអាជីវកម្មធំៗជាច្រើនទៀត ត្រូវបិទទ្វារ ឬក៏ប្រាប់បុគ្គលិកឱ្យធ្វើការពីផ្ទះ ក្នុងគោលបំណងទប់ស្កាត់ការរីករាលដាលនេះ។
នាយករដ្ឋមន្រ្តីចិនលោក Li Keqiang បានធ្វើទស្សនកិច្ចនៅតំបន់កណ្តាលទីក្រុង Wuhan ដែលជាចំណុចស្នូលនៃការផ្ទុះឡើងនេះដោយសារតែរដ្ឋាភិបាល បានព្យាយាមផ្តល់សញ្ញាថា ខ្លួន កំពុងឆ្លើយតបយ៉ាងខ្លាំងចំពោះវិបត្តិនេះ។
ចំនួនករណីសរុប ដែលបានកើតនៅក្នុងប្រទេសចិន គឺបានកើនឡើងប្រហែល ៣០% ដល់ទៅជាង ២.៧០០ នាក់ ហើយប្រហែលពាក់កណ្តាលនៃជនរងគ្រោះ គឺនៅក្នុងខេត្ត Hubei ដែលមាន Wuhan ជាទីរួមខេត្ត ។
នៅពេលដែលការព្រួយបារម្ភ បានកើនឡើងនៅជុំវិញពិភពលោកនោះទឹកដីចិនហុងកុង ដែលមានករណីកើតជំងឺ ចំនួន ៨ដែរនោះ បានហាមឃាត់រាល់ការចូលរបស់ប្រជាជន ដែលបានទៅលេងទីក្រុង Hubei ក្នុងរយៈពេល ១៤ ថ្ងៃកន្លងមក។ ការហាមឃាត់នេះ មិនរាប់លើប្រជាជនហុងកុងទេ។
ខណៈដែលមានករណីមួយចំនួនតូច ត្រូវបានបញ្ជាក់កើតមាន នៅក្នុងប្រទេសជាង ១០ ដែលទាក់ទងទៅនឹងមនុស្សដែលធ្វើដំណើរពីទីក្រុង Wuhan នោះ មិនមានរបាយការណ៍អំពីការស្លាប់ នៅកន្លែងផ្សេងទេ នេះបើតាមការផ្សាយរបស់ Channel News Asia កាលពីថ្ងៃរសៀល ថ្ងៃចន្ទ។