ចំនួនអ្នកឆ្លង COVID-19 ក្នុងប្រទេសប៉េរូ កើនលើស ២០ម៉ឺននាក់

សេចក្ដីលម្អិត

ជំពូក៖ ព័ត៌មានអន្តរជាតិ

(លីម៉ា)៖ ចំនួនអ្នកឆ្លង COVID-19 នៅក្នុងប្រទេសប៉េរូ បានកើនលើស ២០០,០០០នាក់ហើយ ខណៈតំបន់អាមេរិកឡាទីន កំពុងក្លាយជាចំណុចកណ្ដាលថ្មីនៃ ការឆ្លងរាតត្បាតនៃជំងឺដ៏កាចសាហាវមួយនេះ។

នេះបើតាមការចេញផ្សាយដោយទីភ្នាក់ងារព័ត៌មានចិនស៊ីនហួរ នៅថ្ងៃពុធ ទី១០ ខែមិថុនា ឆ្នាំ២០២០។

បើតាមអាជ្ញាធរសុខាភិបាលប៉េរូ គិតត្រឹមថ្ងៃអង្គារសប្ដាហ៍នេះ មនុស្សសរុប ១,២២៧,៦៩១នាក់ បានទទួលការធ្វើតេស្ដរក COVID-19 ក្នុងនោះមាន ២០៣,៧៣៦នាក់តេស្ដវិជ្ជមាន  ហើយក្នុងចំណោម អ្នកឆ្លងទាំងនេះ ទៀតសោត មាន ៥,៧៣៨នាក់ បានស្លាប់ និង៩២,៩២៩នាក់ បានជាសះស្បើយឡើងវិញ។

បច្ចុប្បន្ន ប៉េរូគឺជាប្រទេសមានករណីឆ្លង COVID-19 ច្រើនលំដាប់ទី៨ នៅលើពិភពលោក ហើយរដ្ឋធានីលីម៉ា រងគ្រោះធ្ងន់ធ្ងរជាងគេដោយមានចំនួនអ្នកឆ្លង ១២០,១៨៣នាក់ ក្នុងចំណោមតំបន់ទាំងអស់នៃប្រទេសប៉េរូ៕

ដកស្រង់ពី៖ Fresh News