តួលេខអ្នកស្លាប់ដោយសារជំងឺ COVID-19 នៅប្រទេសប្រេស៊ីល ក្បែរ ៨ម៉ឺននាក់
- សេចក្ដីលម្អិត
- ជំពូក៖ ព័ត៌មានអន្តរជាតិ
ចំនួនអ្នកស្លាប់ដោយសារជំងឺ COVID-19 របស់ប្រទេសប្រេស៊ីល បានកើនឡើងក្បែរ ៨ម៉ឺននាក់ កាលពីថ្ងៃអាទិត្យ បន្ទាប់ពីមានអ្នកស្លាប់ចំនួន ៧១៦ នាក់ក្នុងរយៈពេល ២៤ ម៉ោងចុងក្រោយនេះ និងបានធ្វើឱ្យចំនួនសរុប កើនឡើងដល់ ៧៩,៤៨៨ នាក់។
ក្រសួងសុខាភិបាលប្រស៊ីល បានឲ្យដឹងថា ចំនួនមនុស្ស ដែលបានធ្វើតេស្ត៍វិជ្ជមានចំពោះវីរុសនេះ បានកើនឡើងដល់ ២.០៩៨.៣៨៩ នាក់ បន្ទាប់ពីការធ្វើតេស្តរកឃើញករណីថ្មីចំនួន ២៣.៥២៩ នាក់ក្នុងរយៈពេលដូចគ្នា។
ប្រទេសប្រេស៊ីល មានការរីករាលដាលធំជាងគេលំដាប់ទី ២ នៅលើពិភពលោកបន្ទាប់ពីសហរដ្ឋអាមេរិក ទាំងករណីឆ្លង និងករណីស្លាប់។
រដ្ឋ Sao Paulo ដែលមានប្រជាជនច្រើនជាងគេ គឺជាចំណុចកណ្តាលនៃការផ្ទុះឡើងនៃប្រទេស ដោយមានអ្នកស្លាប់ ១៩.៧៣២ នាក់ និងអ្នកឆ្លងចំនួន ៤១៥.០៤៩ នាក់ បន្ទាប់មក គឺទីក្រុង Rio de Janeiro និងទីក្រុង Ceara នេះបើតាមការផ្សាយរបស់ស៊ិនហួរ-ចិន កាលពីថ្ងៃអង្គារ៍។