អ៊ីរ៉ង់ រឹបអូសកប៉ាល់ដឹកប្រេងរបស់កូរ៉េខាងត្បូងមួយគ្រឿង នៅឯច្រករសមុទ្រ Hormuz ក្រោមហេតុផលថា«រំលោភលើច្បាប់បរិស្ថានដែនសមុទ្រ»

សេចក្ដីលម្អិត

ជំពូក៖ ព័ត៌មានអន្តរជាតិ

(តេហេរ៉ង់)៖ អង្គភាពឆ្មាំបដិវត្តអ៊ីរ៉ង់ បានឲ្យដឹងនៅថ្ងៃចន្ទនេះថា ខ្លួនបានរឹបអូសកប៉ាល់ដឹកគីមីប្រេងមួយគ្រឿង ដែលមានដោតទង់ជាតិរបស់ប្រទេសកូរ៉េខាងត្បូង នៅក្នុងដែនទឹកឈូងសមុទ្រពែក្ស ដោយបានលើកឡើងថា កប៉ាល់នោះបានរំលោភលើ«ច្បាប់បរិស្ថានដែនសមុទ្រ»។

នេះបើយោងតាមការចេញផ្សាយដោយ សារព័ត៌មាន CNA នៅយប់ថ្ងៃចន្ទ ទី០៤ ខែមករា ឆ្នាំ២០២១។ តាមរយៈសេចក្តីថ្លែងការណ៍ នៅលើគេហទំព័ររបស់ខ្លួន ឆ្មាំបដិវត្តអ៊ីរ៉ង់បានលើកឡើងយ៉ាងដូច្នេះថា «កប៉ាល់ដែលកាន់កាប់ដោយប្រទេសកូរ៉េខាងត្បូងមួយគ្រឿង ត្រូវបានកងនាវាចរនៃកងកម្លាំងរបស់យើង បានរឹបអូសយកនៅព្រឹកនេះ»។

សេចក្តីថ្លែងការណ៍ដដែលនេះ បានគូសបញ្ជាក់ទៀតថា «កប៉ាល់ដឹកប្រេងនេះ ចេញពីកំពង់ផែមួយឈ្មោះថា Al Jubail របស់ប្រទេសអារ៉ាប់ប៊ីសាអូឌីត និងត្រូវបានរឹបអូស ដោយសារតែការរំលោភបំពានម្តងហើយម្តងទៀតនូវច្បាប់បរិស្ថានសមុទ្រ»។

គួរបញ្ជាក់ថា ព័ត៌មានអំពីការរឹបអូសកប៉ាល់នេះ បានកើតឡើងចំពេលដែលភាពតានតឹងក្នុងតំបន់បានកើតឡើងជាថ្មី នៅពេលអ៊ីរ៉ង់ប្រារព្ធខួបលើកទី១ នៃការធ្វើឃាត លើមេបញ្ជាការ Qasem Soleimani ក្នុងការវាយប្រហារ ដោយយន្តហោះដ្រូនរបស់អាមេរិក កាលពីខែមករា ឆ្នាំ២០២០ កន្លងទៅ។

ប្រព័ន្ធផ្សព្វផ្សាយរដ្ឋអ៊ីរ៉ង់ នៅថ្ងៃចន្ទនេះបានរាយការណ៍ថា ទីក្រុងតេអេរ៉ង់ បានចាប់ផ្តើមបង្កើនការចម្រាញ់សារធាតុអ៊ុយរ៉ាញ៉ូមដល់ទៅ ២០ភាគរយ នៅឯរោងចក្រក្រោមដីរបស់ខ្លួនមួយកន្លែង នៅក្នុងចលនាមួយដែលធ្វើឲ្យមានការព្រួយបារម្ភ ដល់សហគមអន្តរជាតិ៕