លោកអូបាម៉ានិយាយថា រដ្ឋឥស្លាមនឹងបរាជ័យ
- សេចក្ដីលម្អិត
- ជំពូក៖ ព័ត៌មានអន្តរជាតិ
ប្រធានាធិបតីអាមេរិកលោក បារ៉ាក់ អូបាម៉ា បាននិយាយថា អ្នកសកម្មប្រយុទ្ធរដ្ឋឥស្លាម (IS) "នឹងបរាជ័យ" នៅពេលដែលលោកស្នើសភាឲ្យអនុញ្ញាត ជាផ្លូវការ ដល់កងទ័ពដើម្បី ប្រឆាំងពួកគេ។
លោកអូបាម៉ា បានបន្ដថា "ក្រុមចម្រុះរបស់យើង ស្ថិតនៅក្នុងការវាយលុក ។ Isil (IS) ស្ថិតនៅក្នុងសភាពការពារ ហើយ Isil នឹងទទួលបរាជ័យមិនខាន"។ លោកអូបាម៉ា បានព្រមានប្រឆាំង នឹងការអូសទាញ អាមេរិក ឲ្យធ្លាក់ទៅក្នុងសង្គ្រាម លើដីអូសបន្លាយ មួយទៀត និងបានអំពាវនាវ ដល់សមាជិកសភា ឲ្យបង្ហាញនូវរណសិរ្សរួបរួមមួយ។
អាមេរិក បានធ្វើការវាយប្រហារ តាមផ្លូវអាកាសប្រឆាំង IS ចាប់តាំងពីឆ្នាំទៅនៅក្នុងក្រុមចម្រុះ មួយជាមួយក្រុមផ្សេងៗទៀត ។ នេះគឺជាលើកដំបូងហើយ ដែលប្រធានាធិបតីអាមេរិក ម្នាក់បានស្វែងរកការយល់ព្រមពីសភាដើម្បីប្រើប្រាស់កម្លាំងទ័ព ចាប់តាំងពីប្រធានាធិបតីចច ដាប់ប៊ែលយូ ប៊ូស នៅក្នុងឆ្នាំ២០០២ នាំមុខការវាយលុកនៅអ៊ីរ៉ាក់នោះ មក។
នៅក្នុងសុន្ទរកថា មួយនៅសេតវិមាន លោកអូបាម៉ា បានថ្លែងថា សេចក្ដីព្រាងការអនុញ្ញាតមិនបានផ្លាស់ប្ដូរទិសដៅស្នូលរបស់បេសកកម្មនេះទេ ដើម្បីបំបែក និងបំផ្លាញ IS។ ឈរអមដោយអនុប្រធានាធិបតីចូអ៊ី បាយដិន និងរដ្ឋមន្ដ្រីក្រសួងការបរទេស និងការពារប្រទេសនៅសេតវិមាន លោកអូបាម៉ា បាននិយាយថា នេះមិនមែនជាសញ្ញា នៃសង្គ្រាមមួយគ្មានទីបញ្ចប់នោះទេ ។
លោកអូបាម៉ា បានបន្ដថា លោកមានការជឿជាក់ថា អាមេរិកមិនត្រូវបានអូសទាញ ឲ្យត្រឡប់ទៅក្នុងសង្គ្រាម លើដីអូសបន្លាយដូចនៅមជ្ឈិមបូពា៌ មួយទៀតនោះទេ។ ប៉ុន្ដែលោកបានបញ្ជាក់ថា ការប្រយុទ្ធប្រឆាំងពួក IS នឹងត្រូវចំណាយពេលមួយចំនួន ។ លោកអូបាម៉ា បានបន្ដទៀតថា ការគាំទ្រពីសភា នឹងបញ្ជូននូវសារដ៏ខ្លាំងមួយថា អាមេរិករួបរួមគ្នា នៅក្នុងការប្រឆាំងរបស់ខ្លួន។
លោកអូបាម៉ា បានបន្ថែមទៀតថា មិនត្រូវធ្វើខុសទេ នេះគឺជាបេសកកម្មដ៏ពិបាកមួយ។ ប៉ុន្ដែក្រុមចម្រុះរបស់យើង ស្ថិតនៅក្នុងស្ថានភាពវាយលុក។ ISIL ស្ថិតនៅក្នុងស្ថានភាពការពារ ហើយ ISIL នឹងទទួលបរាជ័យ។ សំណើពង្រាងកាលពីថ្ងៃពុធ នឹងចាត់ទុកជាមោឃៈការអនុញ្ញាតឆ្នាំ២០០២របស់លោកប៊ូស ដើម្បីប្រើប្រាស់កម្លាំងទ័ព (AUMF) ប៉ុន្ដែនឹងទុកនៅនឹងកន្លែងនូវសេចក្ដីសម្រេចឆ្នាំ២០០១ដែលត្រូវបានយល់ព្រម បន្ទាប់ពីការវាយប្រហារភេរវកម្ម នៅថ្ងៃទី១១ ខែកញ្ញា នោះមក ដើម្បីស្វែងរកកិច្ចប្រតិបត្ដិការ របស់អាល់កៃដា៕
ដកស្រង់ពី៖កម្ពុជាថ្មី