ឥណ្ឌាប្រកាសរកឃើញករណីឆ្លងថ្មីៗនៃកូវីដ-១៩ រហូតដល់ជិត៤ម៉ឺននាក់ ក្នុងពេលតែមួយថ្ងៃ

សេចក្ដីលម្អិត

ជំពូក៖ ព័ត៌មានអន្តរជាតិ

 (ញូដេលី)៖ នៅថ្ងៃសុក្រនេះ អាជ្ញាធរឥណ្ឌាបានប្រកាសពីការរកឃើញករណីឆ្លងថ្មីៗនៃជំងឺ COVID-19 រហូតដល់ទៅចំនួនជិត ០៤ម៉ឺននាក់ឯណោះ ក្នុងរយៈពេលត្រឹមមួយថ្ងៃ។

នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី១៩ ខែមីនា ឆ្នាំ២០២១។ ក្រសួងសុខាភិបាលឥណ្ឌាប្រទេសបានឲ្យដឹងថា ចំនួនករណីឆ្លងថ្មីៗនៃ COVID-19 ដែលត្រូវបានរកឃើញក្នុងរយៈពេលមួយថ្ងៃកន្លងទៅ គឺមាន៣៩,៧២៦នាក់ ដែលជាតួលេខឆ្លងប្រចាំថ្ងៃដ៏ខ្ពស់បំផុត គិតក្នុងអំឡុងពេលជាង០៣ខែមកនេះ។

បណ្តារដ្ឋឥណ្ឌាដែលកំពុងរងការឆ្លងរាតត្បាតខ្លាំង ដូចជារដ្ឋម៉ាហារ៉ាស្រ្តា (Maharashtra) នៅភាគខាងលិច បាននិងកំពុងអនុវត្តវិធានការរឹតត្បិតជាថ្មីម្តងទៀត ដើម្បីទប់ទល់ស្ថានការណ៍។

គួរបញ្ជាក់ថា ចំនួនអ្នកឆ្លង COVID-19 សរុបនៅទូទាំងប្រទេសឥណ្ឌា គឺ១១.៥១លាននាក់ ដែលជាចំនួនខ្ពស់បំផុតលំដាប់ទី០៣ បន្ទាប់ពីសហរដ្ឋអាមេរិក និងប្រេស៉ីល។

រីឯចំនួនអ្នកជំងឺដែលបានបាត់បង់ជីវិតវិញមាន១៥៩,៣៧០នាក់ និងជាសះស្បើយជាង១១លាននាក់៕

ដកស្រង់ពី៖ Fresh News