អាមេរិក កំពុងរៀបចំផែនការ តម្រូវឱ្យភ្ញៀវបរទេស ត្រូវចាក់វ៉ាក់សាំង COVID-19

សេចក្ដីលម្អិត

ជំពូក៖ ព័ត៌មានអន្តរជាតិ

មន្រ្តីសេតវិមានម្នាក់ បានប្រាប់រ៉យទ័រកាលពីថ្ងៃពុធ-ម្សិលមិញថា រដ្ឋបាល Biden កំពុងបង្កើតផែនការ ដើម្បីតម្រូវឱ្យអ្នកទេសចរបរទេសស្ទើរតែទាំងអស់ ដែលមកសហរដ្ឋអាមេរិក ចាក់វ៉ាក់សាំងការពារជំងឺកូវីដ -១៩ អោយបានពេញលេញ ដែលជាផ្នែកមួយនៃការលើកលែងការរឹតបន្តឹងការធ្វើដំណើរ ដែលរារាំងពិភពលោកភាគច្រើន មិនឱ្យចូលទឹកដីសហរដ្ឋអាមេរិក។

សេតវិមាន ចង់បើកការធ្វើដំណើរឡើងវិញ ដែលនឹងជំរុញអាជីវកម្មសម្រាប់ក្រុមហ៊ុនអាកាសចរណ៍ និងឧស្សាហកម្មទេសចរណ៍ ប៉ុន្តែមិនទាន់ត្រៀមខ្លួន ដើម្បីដកការរឹតបន្តឹងភ្លាមៗទេដោយសារតែការកើនឡើងនៃករណីឆ្លង COVID-19 និងវីរុសបន្លែងថ្មី Delta ។

ការរឹតត្បិតការធ្វើដំណើរពិសេសរបស់អាមេរិក ត្រូវបានដាក់លើប្រទេសចិនជាលើកដំបូងនៅខែមករាឆ្នាំ ២០២០ ដើម្បីដោះស្រាយការរីករាលដាលនៃជំងឺកូវីដ ១៩ ។ ប្រទេសជាច្រើនផ្សេងទៀត ត្រូវបានបន្ថែម ដែលថ្មីៗបំផុតនោះ គឺឥណ្ឌា នៅក្នុងខែឧសភា។ ការអត្ថាធិប្បាយរបស់មន្រ្តីរូបនេះ គឺជាសញ្ញាដ៏រឹងមាំបំផុត ដែលសេតវិមាន មើលឃើញផ្លូវ ដើម្បីបន្ធូរបន្ថយការរឹតត្បិតទាំងនោះ។

កាលពីខែមុន រ៉យទ័រ បានរាយការណ៍ថា សេតវិមាន កំពុងពិចារណាតម្រូវឱ្យភ្ញៀវបរទេស ត្រូវចាក់វ៉ាក់សាំង ជាផ្នែកមួយនៃការពិភាក្សាអំពីវិធីបន្ធូរបន្ថយការរឹតបន្តឹងការធ្វើដំណើរ។ មន្ត្រីរូបនេះ បានបន្ថែមថា “ក្រុមការងារ កំពុងបង្កើតគោលនយោបាយ និងដំណើរការរៀបចំផែនការ ដើម្បីត្រៀមខ្លួនសម្រាប់ពេលវេលា ដែលត្រូវផ្លាស់ប្តូរទៅប្រព័ន្ធថ្មីនេះ” ។

ប្រទេសមួយចំនួ នរួមទាំងកាណាដា និងចក្រភពអង់គ្លេស កំពុងបន្ធូរបន្ថយ ឬដកការរឹតបន្តឹងសម្រាប់ជនជាតិអាមេរិក ដែលបានចាក់វ៉ាក់សាំងដើម្បីធ្វើដំណើរ នេះបើតាមការផ្សាយរបស់ CNA/Reuters នៅព្រឹកថ្ងៃព្រហ.នេះ។