វ៉ាក់សាំង Pfizer ដូសទី ៣ មានផលប៉ះពាល់ស្រដៀងគ្នាទៅនឹងដូសទី ២

សេចក្ដីលម្អិត

ជំពូក៖ ព័ត៌មានអន្តរជាតិ

 មនុស្សភាគច្រើន ដែលបានទទួលវ៉ាក់សាំងកូវីដ -១៩ របស់ Pfizer ជាដូសលើកទីបី មានអារម្មណ៍ថា មានផលប៉ះពាល់ដូចគ្នា ឬតិចជាងអ្វី ដែលពួកគេទទួលបន្ទាប់ពីទទួលការចាក់ដូសលើកទី ២ នេះបើយោងតាមការស្ទង់មតិដំបូងនៅអ៊ីស្រាអែល។

អ៊ីស្រាអែល បានចាប់ផ្តើមចាក់ថ្នាំបំប៉នប្រហែល ១០ ថ្ងៃមុនដល់មនុស្ស ដែលមានអាយុលើសពី ៦០ ឆ្នាំ ដែលជាផ្នែកមួយនៃកិច្ចខិតខំប្រឹងប្រែង ដើម្បីបន្ថយការរីករាលដាលនៃវ៉ារ្យ៉ង់ Delta ដែលឆ្លងខ្លាំង។ ប្រសិទ្ធភាពនោះ បានប្រែក្លាយអ៊ីស្រាអែលទៅជាកន្លែងសាកល្បងកម្រិតដូស ទីបី មុននឹងមានការយល់ព្រមពីរដ្ឋបាលចំណីអាហារ និងឱសថអាមេរិក។

ក្រុមផ្តល់សេវាថែទាំសុខភាពដ៏ធំបំផុតរបស់អ៊ីស្រាអែល ឈ្មោះ Clalit បាននិយាយកាលពីថ្ងៃអាទិត្យថា ខ្លួន បានចាក់វ៉ាក់សាំង Pfizer-BioNTech ជាដូសលើកទី ៣ ដល់មនុស្សជាង ២៤០.០០០ នាក់។ មនុស្សប្រហែល ៤.៥០០ នាក់ ដែលបានទទួលការចាក់ដូសបំប៉ន ពីថ្ងៃទី ៣០ ខែកក្កដាដល់ថ្ងៃទី ១ ខែសីហា បានឆ្លើយតបទៅនឹងសំណួរ ហើយត្រូវបានបញ្ចូលក្នុងការស្ទង់មតិនេះ។

អ្នកចូលរួមចំនួន ៨៨ ភាគរយនៅក្នុងការស្ទង់មតិ បាននិយាយថា ប៉ុន្មានថ្ងៃ បន្ទាប់ពីទទួលបានការចាក់លើកទី ៣ ពួកគេមានអារម្មណ៍ថា “ស្រដៀងគ្នា ឬប្រសើរជាង” ចំពោះអារម្មណ៍របស់ពួកគេ បន្ទាប់ពីការចាក់លើកទី ២ ។

៣១ ភាគរយ បានរាយការណ៍ពីផលប៉ះពាល់មួយចំនួន ដែលជាការឈឺចាប់ទូទៅបំផុតនៅត្រង់កន្លែងចាក់ថ្នាំ។ ប្រហែល ០,៤ ភាគរយ និយាយថា ពួកគេពិបាកដកដង្ហើម ហើយ ១ ភាគរយ និយាយថា ពួកគេស្វែងរកការព្យាបាលដោយថ្នាំ ដោយសារផលប៉ះពាល់មួយ ឬច្រើន នេះបើតាមការផ្សាយរបស់ CNA/Reuters នៅព្រឹកថ្ងៃចន្ទនេះ។