វៀតណាម កំណត់ថ្ងៃផុតកំណត់ថ្ងៃទី ១៥ ខែកញ្ញា ដើម្បីចាក់វ៉ាក់សាំងមនុស្សពេញវ័យនៅទីក្រុងហាណូយ និងហូជីមិញ

សេចក្ដីលម្អិត

ជំពូក៖ ព័ត៌មានអន្តរជាតិ

 ក្រសួងសុខាភិបាលសវៀតណា បាននិយាយកាលពីថ្ងៃអាទិត្យទី ៥ ខែកញ្ញាថា មជ្ឈមណ្ឌលផ្ទុះមេរោគកូរ៉ូណារបស់ប្រទេស គឺទីក្រុងហូជីមិញ និងរដ្ឋធានីហាណូយ ត្រូវតែចាក់វ៉ាក់សាំងដល់ប្រជាជនពេញវ័យរបស់ពួកគេទាំងអស់ ដោយត្រូវចាក់យ៉ាងហោចណាស់មួយដង ត្រឹមថ្ងៃទី ១៥ ខែកញ្ញា។ ប្រទេសវៀតណាម មានអត្រាចាក់វ៉ាក់សាំងការពារមេរោគកូរ៉ូណាទាបបំផុតនៅក្នុងតំបន់ ដោយមានត្រឹមតែ ៣.៣ ភាគរយនៃប្រជាជន ៩៨ លាននាក់របស់ប្រទេសនេះ បានចាក់វ៉ាក់សាំងពេញលេញ ដោយចាក់ពីរដង និង ១៥.៤ ភាគរយ ដោយចាក់តែម្តង។

ប្រទេសនេះ កំពុងប្រយុទ្ធប្រឆាំងនឹងការផ្ទុះឡើងនៃជំងឺកូវីដ ១៩ ដែលកាន់តែអាក្រក់ទៅ ៗ ដែលបានឆ្លងដល់មនុស្សជាង ៥២០.០០០ នាក់ និងបានសម្លាប់មនុស្ស ១៣.០០០ នាក់ដែលភាគច្រើននៅប៉ុន្មានខែចុងក្រោយនេះ។ ទីក្រុងហូជីមិញ ដែលជាមជ្ឈមណ្ឌលពាណិជ្ជកម្មរបស់ប្រទេស មានចំនួនពាក់កណ្តាលនៃការឆ្លង និង ៨០% នៃអ្នកស្លាប់។

ក្រសួង ក៏បានកំណត់ថ្ងៃផុតកំណត់ថ្ងៃទី ១៥ ខែកញ្ញា សម្រាប់ខេត្តឧស្សាហកម្មភាគខាងត្បូង គឺ Binh Duong, Dong Nai និង Long An ដើម្បីចាក់វ៉ាក់សាំងដល់ប្រជាជនពេញវ័យរបស់ពួកគេទាំងអស់។

រដ្ឋាភិបាលវៀតណាម បាននិយាយនៅចុងថ្ងៃអាទិត្យនេះថា ប្រទេសវៀតណាម បានទទួលវ៉ាក់សាំងការពារមេរោគកូរ៉ូណាចំនួន ៣៣ លានហើយ ហើយរំពឹងថា នឹងទទួលបាន ១៧ លានបន្ថែមទៀតនៅចុងខែនេះ។

នាយករដ្ឋមន្រ្តី Pham Minh Chinh បាននិយាយកាលពីសប្តាហ៍មុនថា ប្រទេសវៀតណាម អាចនឹងប្រឈមមុខនឹងការប្រយុទ្ធប្រឆាំងនឹងមេរោគកូរ៉ូណាយ៉ាងធំ ហើយមិនអាចពឹងផ្អែកលើការបិទខ្ទប់ និងវិធានការដាក់ឲ្យនៅដាច់ដោយឡែកពីគ្នាឡើយ នេះបើតាមការផ្សាយរបស់ CNA/Reuters នៅព្រឹកថ្ងៃចន្ទនេះ។