នាយករដ្ឋមន្ត្រីថៃ ប្រកាសធ្វើដំណើរដោយគ្មានចត្តាឡីស័ក សម្រាប់ទេសចរមកពី៤៥ប្រទេស

សេចក្ដីលម្អិត

ជំពូក៖ ព័ត៌មានអន្តរជាតិ

 អ្នកធ្វើដំណើរមកពីប្រទេស ដែលមានហានិភ័យទាបចំនួន 45 ដែលបានចាក់វ៉ាក់សាំង COVID-19 ពេញលេញ នឹងអាចចេញ-ចូលប្រទេសថៃ ដោយគ្មានលក្ខខណ្ឌតម្រូវចត្តាឡីស័ក ចាប់ពីថ្ងៃទី 1 ខែវិច្ឆិកា ប្រសិនបើពួកគេចូលប្រទេសតាមអាកាស និងធ្វើតេស្តអវិជ្ជមានចំពោះវីរុសនេះ។

ការប្រកាសនេះ ត្រូវបានធ្វើឡើងកាលពីថ្ងៃព្រហស្បតិ៍ ដោយនាយករដ្ឋមន្ត្រី Prayut Chan-o-cha នៅលើទំព័រហ្វេសប៊ុករបស់លោក។ "យើង ត្រូវផ្លាស់ទីឱ្យលឿន ហើយធ្វើវាឥឡូវនេះ ពីព្រោះដោយរង់ចាំឱ្យអ្វីៗគ្រប់យ៉ាងល្អឥតខ្ចោះជាមុនសិននោះ យើង អាចនឹងយឺតពេល" ។ "លើសពីនេះ អ្នកទេសចរ អាចសម្រេចចិត្តធ្វើដំណើរទៅកាន់ប្រទេសផ្សេងជំនួសវិញ"។

ដំបូងឡើយ ប្រទេសថៃ គ្រោងនឹងអនុញ្ញាតឲ្យអ្នកធ្វើដំណើរមកពីប្រទេស ដែលមានហានិភ័យទាបចំនួន ១០ រួមមានសិង្ហបុរី ចិន និងសហរដ្ឋអាមេរិក ចូលតាមផ្លូវអាកាស ដោយគ្មានតម្រូវការចត្តាឡីស័ក ប្រសិនបើពួកគេ បានចាក់វ៉ាក់សាំង COVID-19 ពេញលេញ និងធ្វើតេស្តអវិជ្ជមានចំពោះមេរោគ មុន និង បន្ទាប់ពីការហោះហើររបស់ពួកគេ។ យោងតាមក្រសួងការបរទេសថៃ អ្នកដំណើរ ត្រូវតែស្នាក់នៅក្នុងប្រទេស និងដែនដី ដែលមានសិទ្ធិយ៉ាងហោចណាស់ 21 ថ្ងៃជាប់ៗគ្នា ហើយនឹងត្រូវធ្វើតេស្តប្រតិកម្មខ្សែសង្វាក់ (RT-PCR) ក្នុងរយៈពេល 72 ម៉ោងនៃការធ្វើដំណើរទៅកាន់ប្រទេសថៃ។

នៅពេលពួកគេមកដល់ប្រទេសថៃ ពួកគេ ក៏ត្រូវធ្វើតេស្ត RT-PCR ហើយរង់ចាំលទ្ធផលនៅសណ្ឋាគារ ដែលបានអនុម័តរយៈពេលមួយយប់ ឬរហូតដល់ពួកគេទទួលបានលទ្ធផលតេស្តអវិជ្ជមាន។ ការធានារ៉ាប់រងផ្នែកវេជ្ជសាស្រ្ត រួមជាមួយនឹងទឹកប្រាក់ធានារ៉ាប់រងអប្បបរមាចំនួន 50,000 ដុល្លារអាមេរិក ក៏ជាកាតព្វកិច្ចផងដែរ។

យោងតាមនាយករដ្ឋមន្ត្រី ផែនការនេះ ត្រូវបានផ្លាស់ប្តូរ បន្ទាប់ពីប្រទេសមួយចំនួន បានប្រកាសចាប់ផ្តើមបើកព្រំដែនឡើងវិញ និងបន្ធូរបន្ថយវិធានការផ្សេងៗ ដើម្បីស្វាគមន៍អ្នកធ្វើដំណើរអន្តរជាតិត្រឡប់មកវិញ។

យោងតាមការប្រកាសពីមុនរបស់លោក Prayut នៅដើមខែនេះ តម្រូវការចត្តាឡីស័ក នឹងនៅតែត្រូវបានអនុវត្តចំពោះអ្នកដំណើរមកពីប្រទេស ដែលមិនត្រូវបានបញ្ចូលក្នុងបញ្ជី ហើយការប្រើប្រាស់គ្រឿងស្រវឹងនៅតាមភោជនីយដ្ឋាន នឹងនៅតែត្រូវបានហាមឃាត់នៅក្នុងតំបន់ ដែលមានហានិភ័យខ្ពស់ ដូចជាទីក្រុងបាងកក។

រដ្ឋាភិបាល នឹងពិចារណាលើកលែងការហាមប្រាមគ្រឿងស្រវឹងនៅថ្ងៃទី ១ ខែធ្នូ ហើយកន្លែងកម្សាន្ត ក៏អាចនឹងត្រូវបានអនុញ្ញាតឱ្យដំណើរការឡើងវិញដែរ ដើម្បីជំរុញវិស័យទេសចរណ៍ នេះបើតាមការផ្សាយរបស់ CNA សឹង្ហបុរី នៅព្រឹកថ្ងៃសុក្រនេះ។