កំណើនយ៉ាងខ្លាំងនៃចំនួនមនុស្ស ប្រឈមនឹងគ្រោះទុរ្ភិក្ស

សេចក្ដីលម្អិត

ជំពូក៖ ព័ត៌មានអន្តរជាតិ

 ទីភ្នាក់ងារស្បៀងអាហាររបស់អង្គការសហប្រជាជាតិ បានឲ្យដឹងថា ចំនួនប្រជាជននៅគែមនៃគ្រោះទុរភិក្សក្នុងប្រទេសចំនួន 43 បានកើនឡើងដល់ 45 លាននាក់ ខណៈដែលភាពអត់ឃ្លាន បានកើនឡើងយ៉ាងខ្លាំងនៅជុំវិញពិភពលោក។

កម្មវិធីស្បៀងអាហារពិភពលោក (WFP) បានឲ្យដឹងថា កំណើនពី 42 លាននាក់កាលពីដើមឆ្នាំនេះ ភាគច្រើនធ្លាក់ទៅលើការវាយតម្លៃសន្តិសុខស្បៀង ដែលបានរកឃើញថា មនុស្ស 3 លាននាក់ផ្សេងទៀត កំពុងប្រឈមនឹងគ្រោះទុរ្ភិក្សនៅក្នុងប្រទេសអាហ្វហ្គានីស្ថាន។

នាយកប្រតិបត្តិ WFP លោក David Beasley ត្រូវបានដកស្រង់សម្តីថា "ដោយសារសង្រ្គាម ការប្រែប្រួលអាកាសធាតុ និងជំងឺរាតត្បាតសកល COVID-19 ដែលជំរុញឱ្យចំនួនអ្នកស្រេកឃ្លានយ៉ាងធ្ងន់ធ្ងរ" ។

"ហើយទិន្នន័យចុងក្រោយបំផុតបង្ហាញថា ឥឡូវនេះមានមនុស្សជាង 45 លាននាក់ កំពុងដើរឆ្ពោះទៅរកភាពអត់ឃ្លាន" លោក Beasley បាននិយាយបន្ទាប់ពីការធ្វើដំណើរទៅកាន់ប្រទេសអាហ្វហ្គានីស្ថាន ជាកន្លែងដែល WFP កំពុងបង្កើនការគាំទ្រសម្រាប់មនុស្សជិត 23 លាននាក់។

ការចំណាយលើការទប់ទល់នឹងគ្រោះទុរ្ភិក្សនៅទូទាំងពិភពលោក ឥឡូវនេះមានចំនួន 7 ពាន់លានដុល្លារ កើនឡើងពី 6.6 ពាន់លានដុល្លារ កាលពីដើមឆ្នាំនេះ ប៉ុន្តែបានព្រមានថា ចរន្តផ្តល់មូលនិធិបែបប្រពៃណី ត្រូវបានពង្រីកហួសប្រមាណ។

គ្រួសារ ដែលប្រឈមមុខនឹងអសន្តិសុខស្បៀងធ្ងន់ធ្ងរ កំពុងត្រូវបាន "បង្ខំឱ្យធ្វើជម្រើសដ៏អាក្រក់" ដូចជាលក់កូន រៀបការកូនមុនអាយុ ទាញពួកគេចេញពីសាលារៀន ឬផ្តល់ចំណីពួក គេ ជាសត្វកណ្តូប ស្លឹកព្រៃ ឬដើមប្រទាលដំបងយក្ស។

ការកើនឡើងនៃភាពអត់ឃ្លានយ៉ាងធ្ងន់ធ្ងរ ក៏ត្រូវបានគេមើលឃើញនៅក្នុងប្រទេសអេត្យូពី ហៃទី សូម៉ាលី អង់ហ្គោឡា កេនយ៉ា និងប៊ូរុនឌីផងដែរ នេះបើតាមការផ្សាយរបស់ CNA/Reuters នៅថ្ងៃចន្ទនេះ។