ប្រជាជននេប៉ាល់ ស្រែកសុំឲ្យមានការជួយជាបន្ថែម ខណៈដែលក្រុមសង្គ្រោះ រកឃើញអ្នកនៅរស់ ១៣នាក់
- សេចក្ដីលម្អិត
- ជំពូក៖ ព័ត៌មានអន្តរជាតិ
នេប៉ាល់ ៖ ក្រុមមន្ដ្រីនេប៉ាល់ បានទទួលស្គាល់ថា បានប្រព្រឹត្តខុសឆ្គង នៅក្នុងការឆ្លើយតប ជាដំបូងទៅនឹង ការរញ្ជួយផែនដី មួយដ៏ខ្លាំងក្លា ដែលបានសម្លាប់ មនុស្សអស់ដល់ ទៅជាង ៤,៧០០នាក់ ខណៈពេលដែលអ្នក នៅមានជីវិតរស់រាន បានស្ថិតនៅយ៉ាង ដាច់ឆ្ងាយក្នុងភូមិ និងទីប្រជុំជនដាច់ សង្វែងរង់ចាំជំនួយ និងការឧបត្ថម្ភ មកដល់នៅថ្ងៃពុធ ។
រដ្ឋាភិបាល នៅពុំទាន់បាន ធ្វើការវាយតម្លៃ ជាសរុបទៅលើ មហន្ដរាយ ដោយសារការរញ្ជួយដី ដ៏ខ្លាំងក្លាមានកម្រិត ដល់ទៅ ៧.៩វ៉ិចទ័រ ព្រោះតែមិនអាច ទៅដល់តំបន់ភ្នំជាច្រើន បើទោះជាការផ្គត់ផ្គង់ ជាជំនួយ រួមទាំងបុគ្គលិក ការងារសង្គ្រោះ បានធ្វើដំណើរ ចូលមកដល់ប្រទេសនេះ ពីជុំវិញពិភពលោកក៏ដោយ ។
ជំនួយជាអន្ដរជាតិ បានចាប់ផ្ដើមមក ដល់ប្រទេសនេប៉ាល់ ហើយប៉ុន្ដែការចែកចាយ មានសភាពយឺតយ៉ាវ ពីព្រោះថា ផ្នែកជាច្រើននៃជំនួយទាំងអស់នោះ នៅជាប់គាំងឯព្រលាន យន្ដហោះនៅឡើយ ។ ភាពតានតឹងរវាង ជនបរទេស និងពលរដ្ឋនេប៉ាល់ ដែលអស់សង្ឃឹម ក្នុងការទទួលបាន ជំនួយកំពុងចាប់ ផ្ដើមកើតមានឡើង នេះជាការលើកឡើង ពីក្រុមសង្គ្រោះពេល ដែលផ្ទាំងទឹកកក ព្រមទាំងព្រិល ត្រូវបានគេរាយការណ៍ថា បានធ្លាក់នៅក្នុងតំបន់ មួយចំនួន ។
សមាជិក នៃក្រុមសង្គ្រោះ អ៊ីស្រាអែល មួយហៅថា Magnus និយាយថា អ្នកទេសចររាប់រយនាក់ ក្នុងនោះមានជនជាតិ អ៊ីស្រាអែល ប្រមាណ ១០០នាក់ផងដែរ កំពុងជាប់គាំងនៅឯ Langtang ក្នុងស្រុក Rasuwa ដែលជាតំបន់ដ៏ពេញ និយមស្ថិតនៅ ភាគខាងជើង Kathmandu ព្រោះតែព្រិលធ្លាក់យ៉ាងខ្លាំង កាលពីថ្ងៃអង្គារ ។
នៅពេលនេះ មនុស្សដែល នៅបាត់ខ្លួននៅឡើយ មានដល់ទៅជាង ២៥០នាក់ ។ គួររំលឹកថា គ្រាន់តែនៅតំបន់ Sindhupalchowk ដែលត្រូវធ្វើដំណើរ ប្រមាណ ៣ម៉ោងកន្លះ ពីភាគឦសាន នៃក្រុង Kathmandu នោះ ការរញ្ជួយដី រួមទាំងរអិលបាក់ដី បានសម្លាប់មនុស្សអស់ ១,២០៦នាក់ ហើយអ្នករងរបួសធ្ងន់ បានកើនដល់ ៤០០នាក់ឯណោះ ។
ការរញ្ជួយដីនោះ បានធ្វើឲ្យភ្នំ Mount Everest ធ្លាក់ព្រិល បាក់ផ្ទាំងទឹកកក ដោយស្លាប់អ្នក ឡើងភ្នំយ៉ាងហោច១៨នាក់ រួមទាំងមគ្គុទ្ទេសក៍ ទេសចរទៀតផង ដែលក្នុងនោះ មានជនបរទេស ៤នាក់ ៕
ដកស្រង់ពី៖កម្ពុជាថ្មី