មេដឹកនាំអាហ្វហ្គានីស្ថាន សាទរចំពោះ "សន្តិសុខ" ក្នុងការបង្ហាញខ្លួនដ៏កម្រ ដើម្បីប្រារព្ធពិធីបុណ្យ Eid al-Fitr

សេចក្ដីលម្អិត

ជំពូក៖ ព័ត៌មានអន្តរជាតិ

 មេដឹកនាំកំពូលរបស់ប្រទេសអាហ្វហ្គានីស្ថាន បានបង្ហាញខ្លួនជាសាធារណៈ ជាលើកទីពីរក្នុងរយៈពេលប្រាំមួយឆ្នាំ កាលពីថ្ងៃអាទិត្យ (1 ឧសភា) ដោយប្រាប់អ្នកគោរពបូជារាប់ពាន់នាក់ ដែលប្រារព្ធពិធីបុណ្យ Eid al-Fitr ថា ពួកតាលីបង់ ទទួលបានសេរីភាព និងសន្តិសុខ ចាប់តាំងពីការដណ្តើមអំណាចកាលពីឆ្នាំមុន។

ថ្លែងបែបនេះ ត្រឹមតែពីរថ្ងៃ បន្ទាប់ពីគ្រាប់បែកមួយ បានបំផ្ទុះនៅវិហារអ៊ីស្លាម ក្នុងទីក្រុងកាប៊ុល ជាបរិយាកាសនៃសន្តិសុខរឹតបន្តឹង បានឡោមព័ទ្ធបុរសរូបនោះ ដែលត្រូវបានគេស្គាល់ថា Hibatullah Akhundzada ដែលជាប្រធានក្រុមតាលីបង់។

ខណៈពេលដែលចំនួននៃការបំផ្ទុះគ្រាប់បែកនៅទូទាំងប្រទេស បានធ្លាក់ចុះចាប់តាំងពីទីក្រុងកាប៊ុល បានធ្លាក់ទៅលើពួកតាលីបង់កាលពីខែសីហា-ឆ្នាំមុន ការវាយប្រហារជាច្រើន បានកើនឡើង ក្នុងរយៈពេលពីរសប្តាហ៍ចុងក្រោយនៃខែតមអាហារនៃបុណ្យរ៉ាម៉ាដាន ដែលបានបញ្ចប់កាលពីថ្ងៃសៅរ៍ សម្រាប់ជនជាតិអាហ្វហ្គានីស្ថាន។

ការបំផ្ទុះគ្រាប់បែកកាលពីថ្ងៃសុក្រក្នុងរដ្ឋធានីនោះ គឺបានសម្លាប់មនុស្សជាង ៥០នាក់។ លោក Akhundzada បានផ្តល់សុន្ទរកថាដ៏ខ្លីរបស់ខ្លួន ពីជួរខាងមុខមួយនៃអ្នកគោរពបូជានៅ Kandahar ដោយមិនងាកមុខទៅហ្វូងមនុស្ស នេះបើយោងតាមការបង្ហោះប្រព័ន្ធផ្សព្វផ្សាយសង្គម។

អ្នកឆ្លើយឆ្លងព័ត៌មាន AFP បានរាយការណ៍ថា មន្ត្រីតាលីបង់ មិនអនុញ្ញាតឱ្យអ្នកកាសែតចូលទៅជិតមេដឹកនាំខ្លួនទេ។ ឧទ្ធម្ភាគចក្រពីរគ្រឿង បានហោះពីលើវិហារអ៊ីស្លាមសម្រាប់ព្រឹត្តិការណ៍រយៈពេលពីរម៉ោងទាំងមូល។