ប្រធានាធិបតីហ្វីលីពីន ប្តេជ្ញាហាមឃាត់ការជល់មាន់តាមអ៊ីនធឺណិត

សេចក្ដីលម្អិត

ជំពូក៖ ព័ត៌មានអន្តរជាតិ

 ប្រធានាធិបតីហ្វីលីពីនលោក Rodrigo Duterte បានប្តេជ្ញាហាមប្រាមការជល់មាន់តាមប្រព័ន្ធអ៊ីនធឺណេត បន្ទាប់ពីមានការតវ៉ាជុំវិញឧស្សាហកម្ម ដែលបង្កឡើងដោយការបាត់ខ្លួនកម្មកររាប់សិបនាក់ និងការព្រួយបារម្ភអំពីតម្លៃសង្គមនៃការលេងល្បែង។

ការប្រជល់មាន់ គឺជាកីឡាដ៏ពេញនិយមមួយនៅក្នុងប្រជាជាតិអាស៊ីអាគ្នេយ៍មួយនេះ ប៉ុន្តែជំងឺរាតត្បាតកូវីដ-១៩ បានបង្ខំឱ្យបិទសង្វៀនប្រពៃណី ដែលមានអ្នកទស្សនាសម្រុកទៅមើលសត្វមាន់-ពាក់ខ្នាយស្រួចៗ ប្រយុទ្ធគ្នារហូតដល់ស្លាប់។

ជំនួសមកវិញ រដ្ឋាភិបាល បានផ្តល់សិទ្ធិផ្តាច់មុខដល់ក្រុមហ៊ុនចំនួនប្រាំពីរ ដើម្បីបង្ហាញពីការប្រកួតប្រជែងដ៏បង្ហូរឈាម និងទទួលយកការភ្នាល់តាមអ៊ីនធឺណិត ដែលត្រូវបានគេស្គាល់ថា ជា "e-sabong" - 24 ម៉ោងក្នុងមួយថ្ងៃ។

លោក Duterte ធ្លាប់បានច្រានចោលការអំពាវនាវឱ្យបញ្ឈប់ការអនុវត្តបែបនេះ ដោយកត់សម្គាល់ថា ពន្ធប្រចាំខែប្រហែល 640 លានប៉េសូ (=12 លានដុល្លារអាមេរិក) ពីឧស្សាហកម្មនេះកំពុងជួយបំពេញបន្ថែមនូវថវិការដ្ឋាភិបាល ដែលបាត់បង់ដោយសារជំងឺរាតត្បាត។

ប៉ុន្តែនៅក្នុងសុន្ទរកថាតាមទូរទស្សន៍ ដែលបានចាក់ផ្សាយកាលពីថ្ងៃអង្គារទី 3 ឧសភាប៉ុន្មានសប្តាហ៍មុនពេលលោកចាកចេញពីតំណែង លោក Duterte បាននិយាយថា "e-sabong នឹងបញ្ចប់នៅយប់នេះ" ដោយសារតែ "ផលប៉ះពាល់សង្គម។

មន្ត្រីវិមានប្រធានាធិបតី បានប្រាប់ AFP កាលពីថ្ងៃអង្គារថា បម្រាមនេះ នៅមិនទាន់ត្រូវបានចេញនៅឡើយទេ។ ការជល់មាន់តាមអ៊ីនធឺណិត បានស្ថិតនៅក្រោមការត្រួតពិនិត្យនៅឆ្នាំនេះ បន្ទាប់ពីមានការចោទប្រកាន់ថា ចាប់ជំរិត និងសង្ស័យថា បានសម្លាប់មនុស្ស 34 នាក់ ដែលបានផ្គត់ផ្គង់មាន់ជល់ដល់ប្រតិបត្តិករ e-sabong ដែលមានអាជ្ញាប័ណ្ណ។