នាយករដ្ឋមន្ត្រីអូស្ត្រាលី បង្ហាញទំនាក់ទំនងកាន់តែរឹងមាំជាមួយឥណ្ឌូនេស៊ី លើបញ្ហាសន្តិសុខ និងអាកាសធាតុ

សេចក្ដីលម្អិត

ជំពូក៖ ព័ត៌មានអន្តរជាតិ

 នាយករដ្ឋមន្ត្រីអូស្ត្រាលីលោក Anthony Albanese បានប្រកាសអំពីទំនាក់ទំនងកាន់តែស៊ីជម្រៅជាមួយប្រទេសជិតខា-ងឥណ្ឌូនេស៊ី ដោយសន្យានូវកិច្ចសហប្រតិបត្តិការកាន់តែរឹងមាំលើវិស័យពាណិជ្ជកម្ម សន្តិសុខ និងការប្រែប្រួលអាកាសធាតុ ក្នុងអំឡុងទស្សនកិច្ចទ្វេភាគីលើកដំបូងរបស់លោក កាលពីថ្ងៃចន្ទ (៦ មិថុនា)។

លោក Albanese បានអមដំណើរម្ចាស់ផ្ទះរបស់លោក គឺប្រធានាធិបតី Joko Widodo ជិះកង់លេងកាត់វិមានប្រធានាធិបតីក្នុងទីក្រុង Bogor ដោយជិះកង់ឬស្សី មុនពេលពួកគេចាប់ផ្តើមកិច្ចពិភាក្សាផ្លូវការរបស់ពួកគេ។

ដោយសង្កត់ធ្ងន់លើសារៈសំខាន់ នៃការចូលរួមជាមួយសេដ្ឋកិច្ចដ៏ធំបំផុតរបស់អាស៊ីអាគ្នេយ៍ នាយករដ្ឋមន្ត្រីអូស្ត្រាលីថ្មី បាននាំគណៈប្រតិភូធុរកិច្ចដ៏ល្បីមួយរូប រួមជាមួយរដ្ឋមន្ត្រីការបរទេស Penny Wong និងរដ្ឋមន្ត្រីពាណិជ្ជកម្ម Don Farrell ។

ដំណើរទស្សនកិច្ចនៅប្រទេសឥណ្ឌូនេស៊ី គឺជាដំណើរលើកដំបូងរបស់លោក សម្រាប់ការចរចាទល់មុខគ្នាជាមួយមេដឹកនាំបរទេស។ លោក Albanese បានអះអាងសារជាថ្មីនូវការសន្យាចំនួន 470 លានដុល្លារអូស្ត្រាលី (338.49 លានដុល្លារអាមេរិក) ក្នុងរយៈពេល 4 ឆ្នាំសម្រាប់ការអភិវឌ្ឍន៍នៅក្នុងប្រទេសឥណ្ឌូនេស៊ី និងក្នុងតំបន់ ភាពជាដៃគូផ្នែកអាកាសធាតុ និងហេដ្ឋារចនាសម្ព័ន្ធចំនួន 200 លានដុល្លារអូស្ត្រាលី និងការបង្កើតការិយាល័យអាស៊ីអាគ្នេយ៍ នៅក្នុងក្រសួងការបរទេសរបស់ប្រទេសអូស្ត្រាលី។

លោក Albanese ក៏បានសន្យាបង្កើនកិច្ចសហប្រតិបត្តិការលើវិស័យការពារជាតិ និងសន្តិសុខ និងសុវត្ថិភាពដែនសមុទ្រ ចំពេលមានភាពតានតឹងកើនឡើងរវាងចិន និងសហរដ្ឋអាមេរិកនៅឥណ្ឌូប៉ាស៊ីហ្វិក នេះបើតាមការផ្សាយរបស់ Reuters កាលពីយប់ថ្ងៃចន្ទ។