របាយការណ៍៖ សហរដ្ឋអាមេរិក កំពុងពិចារណាផលិតអាវុធរួមគ្នា ជាមួយតៃវ៉ាន់

សេចក្ដីលម្អិត

ជំពូក៖ ព័ត៌មានអន្តរជាតិ

(វ៉ាស៊ីនតោន)៖ រដ្ឋាភិបាលអាមេរិក កំពុងពិចារណាលើផែនការផលិតអាវុធរួមគ្នាជាមួយកោះតៃវ៉ាន់ នៅក្រោមគំនិតផ្ដួចផ្ដើមមួយក្នុងការពន្លឿនការ ផ្គត់ផ្គង់អាវុធ ដើម្បីជួយពង្រឹងសមត្ថភាពការពារជាតិរបស់ទីក្រុងតៃប៉ិក ទប់ទល់ជាមួយចិន។

នេះបើតាមការដកស្រង់ចេញផ្សាយពីសារព័ត៌មានជប៉ុន Nikkei នៅថ្ងៃព្រហស្បតិ៍ ទី២០ ខែតុលា ឆ្នាំ២០២២។ សារព័ត៌មានជប៉ុន Nikkei ធ្វើសេចក្ដីរាយការណ៍បែបនេះដោយផ្អែកលើប្រភពពីមន្ត្រីអាមេរិកដឹងពីបញ្ហានេះក្នុងលក្ខខណ្ឌមិនបញ្ចេញឈ្មោះ ហើយបើតាមមន្ត្រីទាំងនេះដដែល ផែនការខាងលើអាចនឹងមានរួមបញ្ចូលទាំងការផ្ដល់បច្ចេកវិទ្យាពីសហរដ្ឋអាមេរិក ក្នុងការផលិតអាវុធនៅតៃវ៉ាន់ ឬក៏ផលិតអាវុធនៅក្នុងសហរដ្ឋអាមេរិកដោយមានការចូលរួមពីតៃវ៉ាន់។

ដោយឡែក នៅពេលត្រូវបានសាកសួរពីផែនការនេះដែរ អ្នកនាំពាក្យក្រសួងការបរទេសអាមេរិកម្នាក់បានបញ្ជាក់យ៉ាងខ្លីថាសហរដ្ឋអាមេរិកកំពុងពិចារណាលើគ្រប់ជម្រើសទាំងអស់ ដើម្បីធានានូវការពន្លឿនការផ្គត់ផ្គង់អាវុធឱ្យតៃវ៉ាន់។ គួរបញ្ជាក់ថា ព័ត៌មានស្ដីពីផែនការខាងលើ កើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីរដ្ឋមន្ត្រីការបរទេសអាមេរិក លោក Antony Blinken បានអះអាងថា ចិនកំពុងសម្លឹងមើលឱកាសប្រើកម្លាំងយោធាលើតៃវ៉ាន់ កាន់តែលឿនរហ័សជាងមុន បើទោះជាលោកមិនបានបញ្ជាក់ពីពេលវេលាជាក់លាក់ក៏ដោយ៕

ដកស្រង់ពី៖Fresh News