នូវែលសេឡង់សម្រេចលុបចោលវិធានការរឹតត្បិតកូវីដ១៩ ដែលនៅសល់ចុងក្រោយ

សេចក្ដីលម្អិត

ជំពូក៖ ព័ត៌មានអន្តរជាតិ

 (វែលីងតោន)៖ រដ្ឋាភិបាលនូវែលសេឡង់នឹងដកចេញវិញ នូវវិធានការរឹតត្បិតកូវីដ១៩ ដែលនៅសេសសល់ទាំងប៉ុន្មាន ចាប់ពីវេលាយប់រំលងអធ្រាត្រ ឈានចូលថ្ងៃអង្គារសប្តាហ៍នេះ បន្ទាប់ពីពួកវាត្រូវបានបន្តរក្សាទុក អស់រយៈពេលជាង៣ឆ្នាំមកហើយ គិតចាប់តាំងពីផ្ទុះឡើងនៃជំងឺរាតត្បាតជាសកលនេះ។

នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី១៤ ខែសីហា ឆ្នាំ២០២៣។ រដ្ឋមន្រ្តីសុខាភិបាលនូវែលសេឡង់ លោកស្រី អាយេសា វើរ៉ាល (Ayesha Verrall) បាននិយាយនៅថ្ងៃចន្ទនេះថា ចាប់ពីថ្ងៃអង្គារតទៅ នឹងលែងមានការតម្រូវឱ្យពាក់ម៉ាស នៅតាមមជ្ឈមណ្ឌលថែទាំសុខភាព ឬការធ្វើចត្តាឡីស័ករយៈពេល៧ថ្ងៃ ក្រោយការឆ្លងវីរុសកូវីដទៀតហើយ។

លោកស្រី Verrall បានលើកឡើងយ៉ាងដូច្នេះថា «ស្របពេលដែល ចំនួនករណីឆ្លងរបស់យើង នៅបន្តឡើងចុះមិនទៀងទាត់ក្តី យើងមិនបានសង្កេតឃើញការស្ទុះឡើងខ្លាំងណាមួយ ដូចកាលពីឆ្នាំមុននោះទេ។ ប្រការនេះ និងបូករួមគ្នាជាមួយ កម្រិតប្រព័ន្ធភាពស៉ាំសហគមន៍ គណៈរដ្ឋមន្រ្តីនិងរូបខ្ញុំ បានទទួលការផ្តល់យោបល់ថា ពួកយើងស្ថិតនៅចំណុចមួយ ដែលអាចដកធានការរឹតត្បិត ដែលនៅសេសសល់ទាំងប៉ុន្មាន ចេញវិញដោយសុវត្ថិភាព»។

គួរបញ្ជាក់ថា នូវែលសេឡង់បានលុបចោល វិធានការរឹតត្បិតកូវីដ១៩ ភាគច្រើន កាលពីឆ្នាំ២០២២ ខណៈដែលអត្រាការចាក់វ៉ាក់សាំង បានឈានដល់កម្រិតខ្ពស់ ហើយប្រព័ន្ធសុខាភិបាលរបស់ប្រទេស អាចឆ្លងផុតរដូវរងាដោយជោគជ័យ ដោយសារមិនរងសម្ពាធធ្ងន់ធ្ងរ។

ការសម្រេចចិត្តខាងលើធ្វើឡើង ចំពេលដែលការបោះឆ្នោតសកល នឹងប្រព្រឹត្តទៅនៅរយៈពេលត្រឹម២ខែទៀតប៉ុណ្ណោះ។ ស្របពេលដែលការចាត់ចែងដោះស្រាយវិបត្តិកូវីដ១៩ របស់រដ្ឋាភិបាលនូវែលសេឡង់ ត្រូវបានអន្តរជាតិស្ងើចសរសើរក្តី ក៏នៅតែមានការរិះគន់ក្នុងស្រុកផ្ទាល់ សម្រាប់ការអូសបន្លាយការបិទខ្ទប់ ការបិទសាលារៀន ក៏ដូចជាការបិទព្រំប្រទល់៕

ដកស្រង់ពី៖ Fresh News