ប្រទេសម៉ាឡេស៊ី តម្លើងតម្លៃបារី និងកម្រឹតអាយុ ទិញគ្រឿងស្រវឹង

សេចក្ដីលម្អិត

ជំពូក៖ ព័ត៌មានអន្តរជាតិ

ប្រទេសម៉ាឡេស៊ី នឹងតម្លើងតម្លៃបារី នាចុងខែនេះ នេះបើតាមសំដីរដ្ឋមន្រ្តីក្រសួងសុខាភិបាល នៅថ្ងៃអង្គារ៍នេះ។

លោកថា តម្លៃផលិតផលថ្នាំជក់ រួមទាំងបារី ត្រូវតែតម្លើង ដោយសារតែការកើនឡើងថ្លៃពន្ធ ក្រោមបទបញ្ញាតិលេខ 8A នៃបទបញ្ញាតិគ្រប់គ្រងចំណូលថ្នាំជក់ ឆ្នាំ២០០៤។

ការអនុវត្តន៍នាពេលថ្មីនេះលើពន្ធលក់ និងសេវ៉ាកម្ម (SST) នឹងបង្កឲ្យមានតម្លៃកើនឡើង លើគ្រប់ប្រភេទផលិតផលថ្នាំជក់ រួមមានបារី នេះបើតាមការប្រាប់របស់លោករដ្ឋមន្រ្តីដល់ក្រុមអ្នកកាសែត នាសាលសភា។

លោកវេជ្ជបណ្ឌិតរដ្ឋមន្រ្តី ក៏បាននិយាយផងដែរថា សមាជិកសភាមួយក្នុងចំណោម៨រូប ត្រូវបានពិន័យពីបទជក់បារីក្នុងអគារសភាកាលពីថ្ងៃចន្ទ ហើយជាថ្ងៃដំបូងដែលអគារសភា បានក្លាយជាកន្លែងមិនមានផ្សែងបារី។

រដ្ឋមន្រ្តីក្រសួងសុខាភិបាលរូបនេះ ក៏បានប្រកាសផងដែរថា ប្រទេសម៉ាឡេស៊ី បានបង្កើនអាយុអប្បបរិមារ ក្នុងការទិញគ្រឿងស្រវឹង គឺអាយុ ២១ឆ្នាំ ដែលពីមុនត្រឹម១៨ឆ្នាំ ឲ្យមានប្រសិទ្ធិភាពជាបន្ទាន់។

អ្នកលក់រាយ ឥលូវនេះនឹងត្រូវតម្រូវឲ្យបង្ហាញស្លាកសញ្ញា ដែលបញ្ជាក់ថា គ្រឿងស្រវឹង អាចមានផលប៉ះពាល់ដល់សុខភាព និងញែកឲ្យដាច់នូវគ្រឿងស្រវឹងចេញពីអាហារ ឬភេសជ្ជះផ្សេងៗ។ លោក ក៏បានបន្ថែមថា ច្បាប់ដូចគ្នា ក៏ត្រូវបានយកមកអនុវត្តន៍ចំពោះក្រុមអ្នករៀបចំបុណ្យ អុកតូប៊ឺហ្វេស Oktoberfestផងដែរ។