កូរ៉េខាងត្បូងកំពុងធ្វើតេស្ត «បង្កើតភ្លៀងសិប្បនិម្មិត» ដើម្បីសម្អាតធូលី!
- សេចក្ដីលម្អិត
- ជំពូក៖ ព័ត៌មានអន្តរជាតិ
(សេអ៊ូល)៖ ទីភ្នាក់ងារឧតុនិយម និងក្រសួងបរិស្ថានកូរ៉េខាងត្បូង មានគម្រោងដឹកនាំការធ្វើតេស្ដ បង្កើតភ្លៀងសិប្បនិម្មិត នៅឯតំបន់ដែនទឹក ភាគខាងលិចនៃប្រទេស នៅក្នុងសប្ដាហ៍នេះ ដើម្បីមើលពីប្រសិទ្ធិភាព កាត់បន្ថយធូលី។
នេះបើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ នៅរសៀលថ្ងៃពុធ ទី២៣ ខែមករា ឆ្នាំ២០១៩។ ភ្លៀងសិប្បនិម្មិត នឹងត្រូវធ្វើតេស្ដសាកល្បង នៅថ្ងៃសុក្រសប្ដាហ៍ នៅឯភាគនិរតីនៃខេត្ត គ្យុងជី (Gyeonggi) និងតំបន់ដែនទឹក នៃឆ្នេរភាគខាងលិចប្រទេស ដោយប្រើប្រាស់យន្ដហោះ ឧតុនិយមមួយគ្រឿង។
យន្ដហោះនេះនឹងបាញ់ចេញម្សៅ iodide ប្រាក់ទៅ ក្នុងបរិយាកាសដើម្បីបង្កើតពពក-ភ្លៀងសិប្បនិម្មិត ក្រោមជំនួយពីប្រព័ន្ធផ្កាយរណប និងរ៉ាដា ដែលអាចនឹងផ្លាស់ប្ដូរដង់ស៊ីតេ នៃកម្ទេចធូលី។
គួរបញ្ជាក់ថា កូរ៉េខាងត្បូង ក៏ត្រូវបានគេរាយការណ៍ផងដែរថា ដឹកនាំប្រតិបត្តិការ បង្កើតភ្លៀងសិប្បនិម្មិត ១៥ដងនៅក្នុង ឆ្នាំ២០១៩នេះ។ ប៉ុន្តែទន្ទឹមគ្នា ប្រសិទ្ធភាពនៃការកាត់បន្ថយធូលី តាមរយៈបច្ចេកទេសនេះ មិនទាន់ត្រូវបានបញ្ជាក់នៅឡើយ ទេ ស្របពេលរដ្ឋាភិបាល ប្រធានាធិបតីកូរ៉េខាងត្បូង លោក មូន ជែអ៊ីន កំពុងចាត់វិធានការបន្ថែម កាត់បន្ថយផ្សែង និងធូលី ដោយកាត់បន្ថយ ការប្រើប្រាស់រថយន្ដម៉ាស៊ូត៕
ដកស្រង់ពី៖ Fresh News