សហរដ្ឋអាមេរិក ប្រកាសបញ្ចប់ការដាក់ទណ្ឌកម្មលើកលែងការនាំចូលប្រេងរបស់ប្រទេសអ៊ីរ៉ង់

សេចក្ដីលម្អិត

ជំពូក៖ ព័ត៌មានអន្តរជាតិ

សហរដ្ឋអាមេរិក កំពុងត្រៀមខ្លួនប្រកាសកាលពីថ្ងៃចន្ទថា រាល់ក្រុមហ៊ុននាំចូលប្រេងរបស់ប្រទេសអ៊ីរ៉ង់ទាំងអស់ នឹងត្រូវតែបញ្ចប់នូវការនាំចូលរបស់ខ្លួនជាបន្ទាន់ ឬក៏ក្លាយជាប្រធានបទចំពោះទណ្ឌកម្មរបស់អាមេរិក នេះបើតាមកាសែត Washington Post ផ្សាយកាលពីថ្ងៃអាទិត្យ។

សហរដ្ឋអាមេរិក បានដាក់ទណ្ឌកម្មឡើងវិញកាលពីខែវិច្ឆិកា លើការនាំចេញប្រេងរបស់អ៊ីរ៉ង់ បន្ទាប់ពីលោកប្រធានាធិបតី Donald Trump ដកចេញដោយឯកតោភាគី នូវកិច្ចព្រមព្រៀងអាវុធនុយក្លេអ៊ែរឆ្នាំ ២០១៥មួយ រវាងប្រទេសអ៊ីរ៉ង់ និងមហាអំណាចពិភពលោកចំនួន៦។

រដ្ឋធានីវ៉ាស៊ិនតោន បានកំពុងដាក់គំនាបប្រទេសអ៊ីរ៉ង់ ឲ្យបន្ថយកម្មវិធីនុយក្លេអ៊ែររបស់ខ្លួន និងបញ្ឈប់ការគាំទ្រពួកសកម្មប្រយុទ្ធ ពាសពេញមជ្ឈឹមបូព៌ា។

ផ្គួបជាមួយនឹងទណ្ឌកម្មនានា រដ្ឋធានីវ៉ាស៊ិនតោន ក៏បានផ្តល់នូវការលើកលែងផងដែរដល់បណ្តាប្រទេសសេដ្ឋកិច្ចចំនួន៨ ដែលបានកាត់បន្ថយការទិញប្រេងអ៊ីរ៉ង់ ដោយអនុញ្ញាតិឲ្យពួកគេបន្តលក់ប្រេងនោះ ដោយគ្មានទទួលរងទណ្ឌកម្មសម្រាប់រយះពេល៦ខែបន្ថែមទៀត។

ប្រទេសទាំងនោះ មាន ប្រទេសចិន ឥណ្ឌា ជប៉ុន កូរ៉េខាងត្បូង តៃវ៉ាន់ ទួគី អ៊ីតាលី និងក្រិក។ ប៉ុន្តែកាលពីថ្ងៃចន្ទ រដ្ឋមន្រ្តីក្រសួងការបរទេសអាមេរិក លោក Mike Pompeo បានប្រកាសថា “នៅថ្ងៃទី២ ខែឧសភាខាងមុខ ក្រសួងការបរទេសអាមេរិក នឹងមិនផ្តល់ការលើកលែងទណ្ឌកម្មថែមទៀតទេដល់បណ្តាប្រទេសណាមួយ ដែលបច្ចុប្បន្នកំពុងនាំចូលប្រេងឆៅ ឬកំណកឧស្ម័នពីប្រទេសអ៊ីរ៉ង់” នេះបើតាមការដកស្រង់សំដីមន្រ្តីក្រសួងការបរទេស២រូប ដែលសុំមិនបញ្ចេញឈ្មោះ។

រដ្ឋធានីវ៉ាស៊ិនតោន បើកយុទ្ធនាការនៃ “គំនាបសេដ្ឋកិច្ចអតិបរមា” លើប្រទេសអ៊ីរ៉ង់ ហើយតាមរយះការដាក់ទណ្ឌកម្មផ្សេងៗនោះ ជាយថាហេតុ ខ្លួន មានបំណងដើម្បីបញ្ចប់ការនាំចេញប្រេងរបស់ប្រទេសអ៊ីរ៉ង់ និងដោយហេតុនេះ គឺបានបំបាត់ប្រភពប្រាក់ចំណូលដ៏ចម្បងរបស់ក្រុងតេអេរ៉ង់ នេះបើតាមការផ្សាយរបស់ Channel News Asia នាថ្ងៃចន្ទ។