វៀតណាមរៀបចំធ្វើបុណ្យសពជូនប៉ូលិសបីនាក់ ដែលបានស្លាប់ក្នុងបាតុកម្មដ៏ហិង្សាជុំវិញបញ្ហាដីធ្លី

សេចក្ដីលម្អិត

ជំពូក៖ ព័ត៌មានជាតិ

(ហាណូយ)៖ ពិធីបុណ្យសពមួយនឹងត្រូវធ្វើឡើង នៅក្នុងប្រទេសវៀតណាម សម្រាប់ប៉ូលិសបីនាក់ដែលបានស្លាប់នៅក្នុងការប៉ះទង្គិចគ្នាដ៏ហិង្សា កំឡុងបាតុកម្មតវ៉ារបស់អ្នកភូមិមួយកន្លែង ស្ថិតនៅក្បែរទីក្រុងហាណូយ ដើម្បីបង្ហាញការខឹងសម្បារនឹងអាជ្ញាធរ ដែលសាងសង់របងជញ្ជាំងមួយ នៅលើដីរបស់ពួកគេ។

នេះបើតាមការចេញ ផ្សាយដោយសារព័ត៌មាន BBC នៅរសៀលថ្ងៃព្រហស្បតិ៍ ទី១៦ ខែមករា ឆ្នាំ២០២០។ ការប៉ះទង្គិចគ្នាដ៏ហិង្សារហូតដល់បណ្ដាលឱ្យមានមនុស្សស្លាប់ បានកើតឡើងកាលពីសប្ដាហ៍មុន ដោយអាជ្ញាធរវៀតណាម បានបើកប្រតិបត្តិការសន្តិសុខទ្រង់ទ្រាយធំមួយ នៅក្នុងភូមិ ដុង តេម (Dong Tam) សំដៅបង្រ្កាបអ្នកភូមិនាំគ្នាតវ៉ារឿងជម្លោះដីធ្លី។

ក្រុមអ្នកភូមិបានចោទថា អាជ្ញាធរបានរំលោភលើដីរបស់ពួកគេ តាមរយៈការសង់របងជញ្ជាំង និងព្រលានយន្ដហោះមួយនៅលើដីរបស់ពួកគេ អស់រយៈពេលជាច្រើនឆ្នាំមកហើយ ដោយបណ្ដាលឱ្យអ្នកភូមិទាំងនេះផ្ទុះកំហឹង ឈានដល់ការប្រើប្រាស់ហិង្សាជាមួយប៉ូលិស។

នៅក្នុងបាតុទង្គិចគ្នាក៏បានបណ្ដាលឱ្យថ្នាក់ដឹកនាំម្នាក់ក្នុងភូមិ Dong Tam មានអាយុ ៨៤ឆ្នាំបាត់បង់ជីវិតផងដែរ។ គួរជម្រាបថា ជម្លោះដីធ្លីតែងតែកើតឡើងជារឿយៗ នៅក្នុងប្រទេសវៀតណាម ប៉ុន្តែអំពើហិង្សាបង្កឱ្យមានអ្នកស្លាប់បែបនេះ កម្រកើតឡើងណាស់។

អាជ្ញាធរវៀតណាមបានទម្លាក់កំហុសទាំងឡាយ ទៅលើក្រុមកុប្បករដែលបានប្រើហិង្សារហូតដល់ធ្វើឱ្យប៉ូលិស ០៣នាក់ស្លាប់ ខណៈលោកប្រធានាធិបតីវៀតណាម បានផ្ដល់មេដាយកិត្តិយសដល់ពួកគេទាំងនេះ។

ប៉ុន្តែអ្នកភូមិអះអាងថា ប៉ូលិសបានប្រើប្រាស់កម្លាំងជ្រុលហួសហេតុ៕

ដកស្រង់ពី៖ Fresh News