សម្តេចតេជោ ៖ មួយប៉ព្រិចភ្នែកសោះអ្នកឆ្លងជំងឺកូវីដ-19 ក្នុងពិភពលោកកើនជាង៤លាននាក់
- សេចក្ដីលម្អិត
- ជំពូក៖ ព័ត៌មានជាតិ
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបន្តអំពាវនាវដល់ប្រជាពលរដ្ឋបន្តអនុវត្តន៍វិធានការអនាម័យជាប្រចាំ ដើម្បីទប់ស្កាត់ការឆ្លងជំងឺកូវីដ១៩ ខណៈបណ្តាប្រទេសពិភពបានឆ្លងជំងឺនេះជាង៤លាននាក់ ។
សម្តេចតេជោ បានសរសេរលើបណ្តាញសង្គម នៅថ្ងៃទី១២ ឧសភា ឆ្នាំ២០២០ យ៉ាងដូច្នេះថា៖«សុខសប្បាយជាទេ បងប្អូនជនរួមជាតិ? ។
តែក្នុងមួយប៉ព្រិចភ្នែកសោះចំនួនអ្នកឆ្លងជំងឺកូវីដ-19 នៅក្នុងពិភពលោក គឺបានកើនជាង៤លាននាក់ ។ នេះ គឺក្តីបារម្ភខ្លាំងបំផុតរបស់ពិភពលោកទាំងមូល» ។
សម្តេចបន្តថា ចំពោះនៅប្រទេសយើងវិញ ទោះបីចំនួនអ្នកដែលបានព្យាបាលជាសះស្បើយបានច្រើន ហើយពុំមានអ្នកឆ្លងថ្មីក៏ដោយ គឺសូមបងប្អូនប្រជាពលរដ្ឋបន្តយកចិត្តទុកដាក់ខ្ពស់ជានិច្ច ចំពោះអនាម័យសុខភាពជាប្រចាំដូចជា ត្រូវឧស្សាហ៍ដុសលាងសម្អាតដៃ និងសាប៊ូ ឬទឹកអាល់កុល ឬជែលសម្លាប់មេរោគ នឹងត្រូវពាក់ម៉ាស ឬក្រម៉ាកុំអោយឆ្លងរោគពីយើងទៅគេ និងពីគេមកយើង ព្រោះជំងឺដ៏កាចសាហាវនេះ ងាយឆ្លងលឿនណាស់ ។
ត្រូវបន្តយកចិត្តទុកដាក់ស្តាប់តាមការណែនាំរបស់ក្រសួងសុខាភិបាល ។ ជាមួយគ្នានោះដែរ សម្តេចតេជោ សូមជូនពរបងប្អូនជួបតែសេចក្តីសុខ និងបានចៀសផុតពីជំងឺទាំងពួង៕
ដកស្រង់ពី៖ កោះសន្តិភាព