លោកកឹម សុខា ៖ អំពាវនាវខ្មែរស្រឡាញ់ខ្មែរ និងកុំចេះតែបំបែកបំបាក់ខ្មែរ ដើម្បីមហិច្ឆិតារៀងៗខ្លួន
- សេចក្ដីលម្អិត
- ជំពូក៖ ព័ត៌មានជាតិ
រាជធានីភ្នំពេញ ៖ លោក កឹម សុខា អតីតប្រធានគណបក្សសង្គ្រោះបានអំពាវនាវខ្មែរចេះស្រឡាញ់ខ្មែរ និងកុំចេះតែបំបែកបំបាក់ខ្មែរ ដើម្បីមហិច្ឆិតាផងៗខ្លួន ។
ក្នុងនោះលោក កឹម សុខា ក្នុងខណៈជួបជាមួយលោកជំទាវ Carmen Moreno ឯកអគ្គរដ្ឋទូតសហភាពអឺរ៉ុបប្រចាំព្រះរាជាណាចក្រកម្ពុជា លោកកឹម សុខា
បានលើកឡើងថា បានពិភាក្សា និងផ្លាស់ប្តូរទស្សនៈគ្នាក្នុងកាលៈទេសៈដ៏ចង្អៀតនេះពិតជាមានសារ:សំខាន់ ដោយយើងបានស្វែងយល់ពីគ្នាទៅវិញទៅមកអំពីទំនាក់ទំនង និងកិច្ចសហប្រតិបត្តិការលើកម្មវិធីនានារវាងប្រទេសកម្ពុជា
និងសហភាពអឺរ៉ុបកន្លងមក បច្ចុប្បន្ន និងនៅពេលខាងមុខដូចជា ការរីករាលដាលនៃជម្ងឺឆ្លងកូវីដ-១៩ បញ្ហាសេដ្ឋកិច្ចជីវភាពរស់នៅរបស់ប្រជាពលរដ្ឋ និងបញ្ហាចំពោះមុខមួយចំនួនទៀត ។
លោក កឹម សុខា បានលើកឡើងថា ស្ថិតក្នុងស្ថានភាពពិភពលោកក៏ដូចជា ក្នុងព្រះរាជាណាចក្រកម្ពុជាបាន និងកំពុងជួបប្រទះនូវបញ្ហានានាគួរឲ្យកត់សំគាល់ ជាពិសេសក្នុងពេលថ្មីៗឆ្នាំ២០២១នេះជារៀងរាល់ខែ
លើកលែងតែជិតមួយខែក្នុងវិធានការបិទខ្ទប់នេះខ្ញុំតែងតែជួបសួរសុខទុក្ខជួយជាជំនួយមនុស្សធម៌ខ្លះៗ តាមលទ្ធភាពដែលអាចធ្វើបានចំពោះបងប្អូនជនរួមជាតិខ្មែរដោយផ្ទាល់នៅតាមមូលដ្ឋាន ខេត្តនានាក្នុងព្រះរាជាណាចក្រកម្ពុជា ។
ហើយក្នុងរយៈពេលរៀងរាល់ខែនេះដែរខ្ញុំក៏បានជួបជាមួយឯកអគ្គរាជទូត ឯកអគ្គរដ្ឋទូតនៃបណ្តាប្រទេសជាមិត្តរបស់កម្ពុជាមួយចំនួនពិភាក្សាប្តូរទស្សនៈគ្នា និងសុំឲ្យប្រទេសជាមិត្តទាំងនោះបន្តជួយដល់ប្រជាពលរដ្ឋខ្មែរតទៅទៀត ។
លោកបញ្ជាក់ថា« ខ្ញុំនៅតែយល់ឃើញថា កម្ពុជាយើងជាប្រទេសតូច ប្រជាពលរដ្ឋក្រីក្រ ពេលជួបវិបត្តិម្តងៗ យើងតែងតែត្រូវការជំនួយជាសម្ភារៈថវិកាបច្ចេកទេសក៏ដូចជា ទស្សនៈស្មារតីពីសហគមន៍អន្តរជាតិ ដូចដែលយើងធ្លាប់បានធ្វើ និងបានទទួលកន្លងមក មិនត្រូវអស់សង្ឃឹមមិនត្រូវបោះបង់ ឬទាត់ចោលនូវជំនួយដែលស្មោះត្រង់ពីមិត្តរបស់យើងនោះទេ ។
ក៏ប៉ុន្តែដូចដែលខ្ញុំធ្លាប់បាននិយាយ និងបានធ្វើជាបន្តបន្ទាប់មកហើយ គឺសំខាន់ណាស់អ្វីៗត្រូវតែចាប់ផ្តើមចេញពីយើងជាខ្មែរ និងខ្មែរដូចជា ការស្គាល់សុខទុក្ខរបស់ប្រជាពលរដ្ឋ
និងប្រទេសជាតិយើងចេះស្រឡាញ់រាប់អានគ្នាចេះចូលរួមជួយគ្នាក្នុងគ្រាលំបាកចេះអត់ឱនឲ្យគ្នា ជាពិសេស«សាមគ្គីភាពរវាងខ្មែរ និងខ្មែរ» ដោយមិនមែនចេះតែបំបែកបំបាក់ខ្មែរ ដើម្បីមហិច្ឆិតារៀងៗខ្លួននោះទេ ៕
ដកស្រង់ពី៖ កោះសន្តិភាព