ក្រសួងសុខាភិបាលអំពាវនាវពលរដ្ឋកុំចាញ់បោកហ្វេសប៊ុកឈ្មោះ «ស្លាបប៉ាកកាទេវរាជ»
- សេចក្ដីលម្អិត
- ជំពូក៖ ព័ត៌មានជាតិ
រាជធានីភ្នំពេញ ៖ មន្ត្រីជាន់ខ្ពស់ក្រសួងសុខាភិបាលបានអំពាវនាវដល់ប្រជាពលរដ្ឋ ពិសេសអ្នកលេងហ្វេសប៊ុក កុំចាញ់បោកហ្វេសប៊ុកឈ្មោះ«ស្លាបប៉ាកកាទេវរាជ» ដោយផ្ញើថវិកា១ដុល្លារទៅឲ្យពាក់ព័ន្ធនឹងការចាក់វ៉ាក់សាំង ។
លោកជំទាវឱ វណ្ណឌីន រដ្ឋលេខាធិការក្រសួងសុខាភិបាល និងប្រធានគណៈកម្មការចំពោះកិច្ចចាក់វ៉ាក់សាំងការពារជំងឺកូវីដ-១៩ ក្របខណ្ឌទូទាំងប្រទេសបានប្រាប់ប្រជាពលរដ្ឋថា កុំផ្ញើថវិកា១ដុល្លារទៅហ្វេកប៊ុកឈ្មោះ «ស្លាបប៉ាកកាទេវរាជ» ព្រោះថា ជាល្បិចសម្រាប់ប្រមូលថវិការបស់ខ្លួន ខណៈការចាក់វ៉ាក់សាំងមិនគិតថ្លៃឡើយ ។
ក្នុងឱកាសយកអំណោយសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាចំនួន១០លានរៀល និងសម្ភារជូនដល់អ្នកស្ម័គ្រចិត្តចាក់វ៉ាក់សាំងកូវីដ-១៩ ទី៦ លាន អ្នកស្រី ផេង សឿន រស់នៅស្រុកចំការលើ នាថ្ងៃទី២០ ខែកក្កដានេះ លោកជំទាវឱ វណ្ណឌីន បានបញ្ជាក់ថា
«សូមបងប្អូនកុំជឿ នេះ គឺល្បិចសម្រាប់ប្រមូលលុយ ចឹងប្រសិនឃើញលេខ 500 013 244 សូមកុំទាក់ទងឱ្យសោះ បើតេរកបងប្អូនបិទ ហើយបងប្អូនក៏មិនត្រូវទាក់ទង ហើយបញ្ជូនលុយទៅអាខោននេះដែរ (អាខោនឈ្មោះស្លាបប៉ាកកាទេវរាជ) នេះ គឺជាការប្រមូលថវិកាពីបងប្អូនប្រជាពលរដ្ឋ» ។
លោកជំទាវបន្ដថា គណៈកម្មការចំពោះកិច្ចចាក់វ៉ាក់សាំងការពារជំងឺកូវីដ-១៩ ក៏បានច្រានចោលទាំងស្រុង ចំពោះការផ្សាយហ្វេសប៊ុកឈ្មោះ ស្លាបប៉ាកកាទេវរាជ ។
លោកស្រី ប្រកាសថា ការចាក់វ៉ាក់សាំងកូវីដ-១៩ ជូនប្រជាពលរដ្ឋ នាពេលបច្ចុប្បន្ន គឺមិនគិតថ្លៃឡើយ បើសិនមានបុគ្គលណាស្នើសុំថវិកាពីប្រជាពលរដ្ឋកុំផ្ដល់ថវិកាឱ្យសោះ ជាពិសេសនោះត្រូវរាយការណ៍សមត្ថកិច្ចភ្លាមៗ ដើម្បីចាក់វិធានការតាមផ្លូវច្បាប់ ។
សូមជម្រាបថា ការលើកឡើងរបស់ក្រសួងសុខាភិបាលបែបនេះក្រោយមានហ្វេសប៊ុកមួយឈ្មោះ ស្លាបប៉ាកកាទេវរាជបានបង្ហោះថា «ការចាក់វ៉ាក់សាំងយកកាត គឺជាការរៀបគម្រោងប្លន់អាយុជីវិតប្រជាជនខ្មែររបស់រាជរដ្ឋាភិបាល សូមឧបត្ថម្ភម្នាក់១ដុល្លារ ដើម្បីជីវភាពរស់តាមរយៈលេខ ABA 500 013 244»។
យោងតាមរបាយការណ៍របស់ ក្រសួងសុខាភិបាល បានឲ្យដឹងថា គិតត្រឹមថ្ងៃទី១៩ ខែកក្កដា ឆ្នាំ២០២១ ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងការពារកូវីដ-១៩ ជូនមន្ត្រីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសចំនួន ៦,០៦១,៣០៥នាក់ ។
ដោយឡែក លទ្ធផលចាក់វ៉ាក់សាំងគោលដៅ១០លាននាក់ បានចំនួន៦០.៦១% ហើយ៕
ដកស្រង់ពី៖ កោះសន្តិភាព