សម្តេចតេជោ ៖ ថ្ងៃ២៤ ធ្នូ គណៈកម្មការកណ្តាលគណបក្សប្រជាជននឹងបើកសន្និបាទផ្ទៃក្នុងប្រកាសបេក្ខជននាយករដ្ឋមន្ត្រីបន្ត
- សេចក្ដីលម្អិត
- ជំពូក៖ ព័ត៌មានជាតិ
ខេត្តកណ្តាល ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ នៅថ្ងៃទី២៤ធ្នូ ឆ្នាំ២០២១ខាងមុខនេះ គណៈកម្មការកណ្តាលគណបក្សប្រជាជនកម្ពុជានឹងបើកសន្និបាទផ្ទៃក្នុងពិភាក្សាក្នុង ករណីប្រកាសបេក្ខជននាយករដ្ឋមន្ត្រីបន្ត និងកិច្ចការមួយចំនួនទៀតដែលត្រូវផងដែរ ។
ថ្លែងក្នុងពិធីចុះត្រួតពិនិត្យការដ្ឋានសាងសង់ព្រលានយន្តហោះអន្តរជាតិភ្នំពេញថ្មី ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល នាព្រឹកថ្ងៃទី៩ ខែធ្នូ ឆ្នាំ២០២១ សម្តេចតេជោ បានបញ្ជាក់ថា
៖«ថ្ងៃ២៤ ធ្នូ ខាងមុខនេះ គណៈកម្មការកណ្តាល គណបក្សប្រជាជនកម្ពុជានឹងបើកសន្និបាទរបស់ខ្លួនពិភាក្សាលើករណីប្រកាសបេក្ខជននាយករដ្ឋមន្ត្រី និងកិច្ចការមួយចំនួនទៀត ដូច្នេះសមាជិកគណបក្សកណ្តាលត្រៀមខ្លួន» ។
សម្តេចបានលើកឡើងថា បេក្ខជននាយករដ្ឋមន្ត្រីបានប្រកាសរួចមកហើយ គឺគាំទ្រកូនប្រុសច្បងរបស់សម្តេចធ្វើជាបេក្ខជនាយករដ្ឋមន្ត្រីបន្តដោយឆ្លងការបោះឆ្នោត ។
សូមជម្រាបថា កាលពីពេលកន្លងមកនេះ នៅក្នុងពិធីសម្ពោធផ្លូវ និងសមិទ្ធិផលនានានៅក្រុងព្រះសីហនុសម្តេចបានប្រកាសជាសាធារណៈសម្តេចគាំទ្រលោក ហ៊ុន ម៉ាណែត
ដែលជាកូនប្រុសច្បងជាបេក្ខជននាយករដ្ឋមន្ត្រីបន្ត ដោយឆ្លងកាត់បោះឆ្នោត ។ជាមួយគ្នានោះដែរ សម្តេចក៏បានលើកឡើងថា ថ្នាក់ដឹកនាំគណបក្សប្រជាជនផ្សេងទៀតអាចដាក់បេក្ខជនជាកូនរបស់ខ្លួនក្នុងការប្រជែងបេក្ខជននាយករដ្ឋមន្ត្រីបាន ៕
ដកស្រង់ពី៖ កោះសន្តិភាព