នាយករដ្ឋមន្ត្រីកម្ពុជា ៖ ជិតដល់ថ្ងៃអួតអាងរឿងទឹកដីកម្ពុជាក្រោម កោះត្រល់ និងតម្លៃសាំងឡើងហើយ
- សេចក្ដីលម្អិត
- ជំពូក៖ ព័ត៌មានជាតិ
រាជធានីភ្នំពេញ ៖ សម្តេចតេជោ ហ៊ុន សែន បានបញ្ជាក់រដូវអួតអាងរបស់គណបក្សនយោបាយ ជិតនឹងមកដល់ ក្នុងនោះប្រធានបទលើកឡើងមានបញ្ហាទឹកដីកម្ពុជាក្រោម កោះត្រល់ និងថ្លៃសាំងជាដើម ។
ការលើកឡើងរបស់សម្តេចេតេជោ ខណៈការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ ជិតមកដល់ នៅថ្ងៃទី៥ ខែមិថុនាឆ្នាំ២០២២ ។
សម្តេចតេជោ ហ៊ុន សែន នាយករដ្ឋមន្ត្រីបានថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារមជ្ឈមណ្ឌលត្រចៀក ច្រមុះ បំពង់ក នៃមនី្ទរពេទ្យព្រះអង្គឌួង នាព្រឹកថ្ងៃទី២៨ ខែមីនានេះ បានលើកឡើងថា មានអ្នកខ្លះចូលខំមិនឲ្យសម្តេចលើកទ័ព ដើម្បីយកកម្ពុជាក្រោមមកវិញ តែសម្តេចថា សុំទៅវៃខ្លួនឯងទៅ ។
ពីព្រោះថា ទឹកដីកម្ពុជាក្រោម បានបាត់តាំងពីសម័យណាមកហើយ មកឲ្យហ៊ុនសែនទៅវៃយក ។
សម្តេចបញ្ជាក់ថា ៖«បើហ៊ុន សែន ទៅវៃ តើអ្នកណាស្នេហាជាតិជាងព្រះករុណាព្រះបិតាព្រះបរមរតនកោដ្ឋទៀត ។
ម៉េចមិនព្រះអង្គយកកម្ពុជានៅពេលព្រះអង្គកាន់អំណាច ចាំទុកឲ្យហ៊ុន សែនកើតក្រោយវិញ?
ខ្ញុំចោលសំណួរបែបនេះវិញ? ម៉េចបានជាព្រះបិតាវៃយកទឹកដីកម្ពុជាពេលព្រះអង្គរកាន់អំណាចក្នុងចន្លោះឆ្នាំ១៩៥៣មក១៩៧០?
ហើយលន់នល់កាន់អំណាចក្នុងចន្លោះ ឆ្នាំ១០៧០ដល់១៩៧៥ ចាំមកប្រើក្បាលហ៊ុន សែន ?»។
សម្តេចបានលើកឡើងថារឿងទឹកដីកម្ពុជាក្រោមនេះបានកើតឡើងតាំងពីសម្តេចមិនទាន់កើតផង មកដាក់ទោសហ៊ុន សែនដែរ ។
រឿងកោះត្រល់ កម្ពុជាក្រោម កូរសាំងស៊ីល មកបន្ទោសហ៊ុន សែន គ្រប់រឿង ។
ជាមួយគ្នានោះដែរ សម្តេចក៏បានឲ្យដឹងថា តិចទៀតដល់រដូវបោះឆ្នោតក្រុមប្រឆាំងនឹងយកគោលនយោបាយថា បើនឹងឈ្នះនឹងយកកម្ពុជាក្រោមទៅយកកោះត្រល់ និងដេញថ្លៃសាំងជាដើម ។
សម្តេចបានបញ្ជាក់ថា ៖«តិចទៀតដល់ពេលថា បើកគេឈ្នះ និងយកកម្ពុជាក្រោមយកកោះត្រល់នឹងដេញថ្លៃសាំងចុះមកមួយលីត្រ២ពាន់ ឬ៣ពាន់រៀល ដោយថា រដ្ឋាភិបាលបច្ចុប្បន្នអត់មានសមត្ថភាពដោះស្រាយថ្លៃសាំងទេ» ។
ជាមួយគ្នានោះដែរ សម្តេចតេជោក៏បានលើកឡើងថា តិចទៀតរដូវអួតអាងមកដល់ហើយ យើងជារាជរដ្ឋាភិបាលមិនអាចនិយាយបានទេ ។
សម្តេចថា នៅលើសកលលោកថ្លៃសាំងបានកំពុងកើនឡើងរួមទាំងប្រទេសអ្នកផលិតផងដែរ ៕
ដកស្រង់ពី៖ កោះសន្តិភាព