បុត្រមួយអង្គរបស់សម្តេចក្រុមព្រះ និងអ្នកម្នាងផល្លា ឡើងឋានៈ «ជាព្រះអង្គម្ចាស់»
- សេចក្ដីលម្អិត
- ជំពូក៖ ព័ត៌មានជាតិ
រាជធានីភ្នំពេញ ៖ ព្រះអង្គ នរោត្តម សុធាឫទ្ធិ បុត្រាមួយអង្គរបស់សម្តេចក្រុមព្រះ និងអ្នកម្នាងផល្លា ត្រូវបានព្រះមហាក្សត្រ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យត្រាស់បង្គាប់តម្លើងឋានៈ «ព្រះអង្គម្ចាស់» និងក៏ត្រូវបានតែងតាំងជាទីប្រឹក្សាអមព្រះរាជលេខាធិការដ្ឋានព្រះមហាក្សត្រ មានឋានៈស្មើអនុរដ្ឋលេខាធិការផងដែរ ។
នេះបើតាមព្រះរាជក្រឹត្យចុះថ្ងៃទី៣ ខែឧសភា ឆ្នាំ ២០២២ និងចុះព្រះហត្ថលេខាដោយព្រះមហាក្សត្រ ។ជាមួយគ្នានោះផងដែរ ព្រះអង្គម្ចាស់ នរោត្តម ចក្រាវុធ ជាបុត្រាច្បងរបស់ព្រះអង្គម្ចាស់ នរោត្តម រណឫទ្ធិ និងជាព្រះប្រធានគណបក្សហ្វ៊ុនស៊ិនប៉ិច
ក៏បានបង្ហោះសារចូលរួមអបអរសាទរព្រះអនុជ ព្រះអង្គម្ចាស់ នរោត្តម សុធាឫទ្ធិ (មាតាទីទៃ) ចំពោះការទទួលបានឋានៈ និងតួនាទីថ្មីនេះផងដែរ ។
«ខ្ញុំសូមអបអរសាទរ ប្អូនប្រុសនៃខ្ញុំ (ព្រះអនុជ) ដែលត្រូវបាន ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហក្សត្រ នៃព្រះរាជាណាចក្រកម្ពុជា ប្រោសព្រះរាជទាន តម្លើងឋានៈ ជាព្រះអង្គម្ចាស់ និងតែងតាំង
ជាទីប្រឹក្សាអមព្រះរាជលេខាធិការដ្ឋាន ព្រះមហាក្សត្រ មានឋានស្មើអនុរដ្ឋលេខាធិការ ដើម្បីរួមដង្ហែ តាមព្រះរាជបេសកកម្ម បម្រើជាតិ សាសនា និងប្រជានុរាស្ត្រ នៃព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហក្សត្រ នៃព្រះរាជាណាចក្រកម្ពុជា» ។
នេះជាការបញ្ជាក់របស់ ព្រះអង្គម្ចាស់ នរោត្តម ចក្រាវុធ ។ព្រះអង្គម្ចាស់ នរោត្តម ចក្រាវុធ បានបន្ថែមថា «ត្បិតថាពេល ព្រះបិតា (សម្តេចក្រុមព្រះ នរោត្តម រណឬទ្ធិ ) គង់នៅឋានព្រះបរមសុខ ព្រះអង្គពិតជាពេញព្រះទ័យ ដែលព្រះរាជបុត្រា
ព្រះរាជបុត្រី របស់ព្រះអង្គទាំងអស់មានឱកាសក្នុងការបម្រើជាតិមាតុកម្ពុជា សាសនា និងព្រះមហាក្សត្រ និងរួមគ្នាធ្វើយ៉ាងថែរក្សានូវសុខសន្តិភាព
ស្ថេរភាពនយោបាយ ការអភិវឌ្ឍ ព្រះរាជាណាចក្រកម្ពុជា តាមព្រះរាជគំរូវីរភាពដ៏ឧត្តុង្គឧត្តមបំផុតនៃ ព្រះករុណា ព្រះបាទ សម្តេចព្រះ នរោត្តម សីហនុ ព្រះមហាវីរក្សត្រ ព្រះបរមរតកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត
និងក្រោមម្លប់ដ៏ត្រជាក់នៃ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត និងស្របតាមគោលបាយរបស់រាជរដ្ឋាភិបាលកម្ពុជា» ៕
ដកស្រង៉ពី៖ កោះសន្តិភាព