លោក ឡុង ឌីម៉ង់ បង្ហាញពីលទ្ធផលបេសកកម្មប្រាំថ្ងៃ ជាមួយនិងការពាំនាំនូវសំណូមពររបស់សហគមន៍ខ្មែរនៅកូរ៉េខាងត្បូង ដើម្បីផ្តល់ដំណោះស្រាយ
- សេចក្ដីលម្អិត
- ជំពូក៖ ព័ត៌មានជាតិ
កូរ៉េខាងត្បូង៖ ក្នុងបេសកកម្មចុងក្រោយតបតាមការអញ្ជើញរបស់លោកស្រីជ្រឹង បុទុមរង្សី ឯកអគ្គរាជទូតកម្ពុជាប្រចាំនៅប្រទេសកូរ៉េខាងត្បូង កាលពីថ្ងៃទី១៦ ខែឧសភា ឆ្នាំ២០២២នេះ លោក ឡុង ឌីម៉ង់ អនុប្រធានក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជានៅទ្វីបអាស៊ីខាងកើត និងអាគ្នេយ៍
និងជាអនុប្រធានក្រុមទទួលបន្ទុកប្រទេសកូរ៉េខាងត្បូង ,កញ្ញាស្រ៊ុន ស្រីនាង ព្រមទាំង ក្រុមការងារបានជួបពិភាក្សាអំពីកិច្ចការងារពង្រឹងគណបក្ស និងការងារសហគមន៍ខ្មែរនៅកូរ៉េខាងត្បូង។
ក្នុងឱកាសនោះលោក ឡុង ឌីម៉ង់ បានជម្រាបជូនអំពីលទ្ធផលនៃបេសកកម្មចំនួន ប្រាំ ថ្ងៃ នៅថេហ្គូ គូមី និងក្វាងជូ និងបានពាំនាំនូវសំណូមពររបស់សហគមន៍ខ្មែរ ជូនក្រុមការងារស្ថានទូត ដើម្បីពិចារណា និងផ្តល់នូវដំណោះស្រាយ។
ក្នុងពេលស្នាក់នៅនិងបំពេញការងារនៅកូរ៉េខាងត្បូងនោះលោក ឡុង ឌីម៉ង់ បានបន្តជួបពិភាក្សាការងារជាមួយលោកសមាជិករដ្ឋសភា AHN GYU Back ដើម្បីបង្កើតកិច្ចសហប្រតិបត្តិការវិស័យដឹកជញ្ជូនផ្លូវទឹកនៅខេត្តព្រះសីហនុ។
បន្ថែមពីនេះ លោក ឡុង ឌីម៉ង់ ក៏បានជួបសំណេះសំណាលជាមួយលោកគ្រូ អ្នកគ្រូ ជាជនបង្គោលសំខាន់ៗ នៅតាមតំបន់ជិតទីក្រុងសេអ៊ូល ដូចជាសេអ៊ូលអានសាន គីមផូ ផូឆុន ស៊ូវ៉ុន អ៊ឺយចុងប៊ូ សុងណាំ ផារ៉ាន់ និងអាជីវករលក់ឡាន…។ល។
ព្រមទាំងបានអញ្ជើញលោកស្រីជ្រឹង បុទុមរង្សី និងមន្ត្រីស្ថានទូតចូលរួម សរុបប្រមាណជាង៨០នាក់។
ក្នុងពិធីសំណេះសំណាលជាមួយសកម្មជនបក្ស និងសហគមន៍ លោក ឡុង ឌីម៉ង់ បានពាំនាំនូវប្រសាសន៍ផ្តាំផ្ញើរសួរសុខទុក្ខពីសំណាក់ លោកបណ្ឌិត ហ៊ុន ម៉ាណែត ,លោកហេង សួរ ,
លោក ហុង ជឿន និងបានផ្សព្វផ្សាយអំពីបច្ចុប្បន្នភាពនៃកម្ពុជា សមិទ្ធផលថ្មីៗរបស់រាជរដ្ឋាភិបាល និងបានស្នើសុំអោយបងប្អូនជួយផ្សព្វផ្សាយ និងផ្តាំផ្ញើដល់ឱពុកម្តាយ បងប្អូន សាច់ញាតិ និងមិត្តភ័ក្តអោយទៅបោះឆ្នោត និងបោះឆ្នោតអោយបានគ្រប់ៗគ្នាជូនគណបក្សប្រជាជនកម្ពុជា នាថ្ងៃទី០៥ ខែមិថុនា ឆ្នាំ ២០២២ ខាងមុខនេះ។
ជាមួយគ្នានេះ លោកស្រីជ្រឹង បុទុមរង្សី ឯកអគ្គរាជទូតកម្ពុជាប្រចាំនៅប្រទេសកូរ៉េខាងត្បូង ក៏បានឡើងថ្លែងនូវចំណាប់អារម្មណ៍ និងមានមតិសំណេះសំណាលជាមួយសហគមន៍ខ្មែរផងដែរ៕
ដកស្រង់ពី៖ រស្មីកម្ពុជា